ऑगस्ट २०१७ महिन्याचे राशीभविष्य सिंह राशी मधे बुध वक्री होणे का शेअर मार्केटपर परिणाम होईल का ?

राशी भविष्य लिहून ते ब्लॉगवर प्रसिध्द करायला लागल्याला वर्ष पुर्ण होत आहे. या निमीत्ताने काही नविन संकल्पाचे मनात आहे. फ़ेस बुक वर जसा नक्षत्रप्रकाश ज्योतिषविषयक नविन समूह मागील महिन्यात सुरु झाला आहे. याचे सदस्य होण्यासाठी ही लिंक घ्या https://www.facebook.com/groups/npastrogroup/  राशीभविष्य दरमहिन्याला प्रसिध्द झाले की त्याची माहिती या फ़ेसबुकच्या नक्षत्रप्रकाश ज्योतिष समुहावर  आपल्या मिळणारच आहे.

मागच्या महिन्यात मुंबई शेअर मार्केटने उच्चांक नोंदवला होता. करेक्षन होऊन हा निर्देशांक स्थिर ही झाला असेल. काही तात्कालीक कारणे अशी घडतील की निर्देशांक पुन्हा खाली येईल असा. शेअर बाजारात बुध वक्री झाला की निर्देशांक खाली येतो. असा अनुभव आहे त्यामुळे १३ ऑगस्ट पुर्वी आपली पोझीशन आधीच तपासुन घ्या. बुध वक्री झाल्याचे बरेच परिणाम कमोडीटी मार्केटवर सुध्दा पडतात असाही अनुभव आहे.

१५ ऑगस्टला लाल किल्यावरुन भाषण होताना प्रधानमंत्री नविन संकल्प करतील त्यामुळे राजकारणाला नविन दिशा मिळेल. मागील वर्षीच्या भाषणात पाकिस्थान मधे बलुचिस्थानच्या स्वतंत्र होण्याचा उल्लेख केला गेला आणि त्यामुळे पाकिस्थानला ते झोंबले असेल. यामुळे ह्या भाषणानंतर काश्मिरमधला पाकिस्थानी कारवायांचा वेगही वाढला आहे. यावर्षी मोदीजी अजुनही काही बोलतील. सिंह या स्वत:च्या राशीत रवि गेल्याने ही डरकाळी येणे स्वाभाविक आहे. त्याचे परिणाम जेव्हा मंगळ -हर्षलचा प्रतियोग होईल तेव्हा दिसेल. ३० नोव्हेंबर पासुन हे दिसेल.

ऑगस्ट महिन्यात २५ तारखेला गणेश चतुर्थी आहे. ही बुध्दीची देवता आहे. ज्यांना असे वाटते की जन्मत: आपल्याला बुध्दीचे वरदान नाही त्यांनी किमान दीड दिवसाचे हे व्रत करावे. गणेश पुराणात या व्रताचे वर्णन दीड दिवसाच्या व्रताचेच आहे. आता बुध्दीप्रामाण्यवादी किंवा विज्ञानवादी म्हणतील की बुध्दीची वाढ वय ८ ते १० नंतर थांबते पण बुध्दीचा वरचा स्तर ज्याला प्रज्ञा असे म्हणतात तो योगाभ्यासाने किंवा ईश्वरप्रणिधानाने जागृत होतो असे सुत्र " योगसुत्र" ह्या पतंजली महामुनींच्या ग्रंथात आहे. " विद्यार्थी लभते विद्या, धनार्थी लभते धन, पुत्रार्थी लभते पुत्रा, मोक्षार्थी लभते गतीं " असे सुत्र सांगताना सहा महिन्याच्या उपासनेने हे सर्व मिळते संशय घेऊ नका असे स्त्रोत्र कर्ते सांगतात. माणसाला अजुन काय हवे ? श्री गणपती अथर्वशिर्ष हे तर एक उपनिषद आहे. यावर भाष्य करणे माझा अधिकार नाही. हे लिहायचा उद्देश्य इतकाच की अनुभव घेतला नसेल तर ह्या गणेश चतुर्थीला पार्थिव गणेशाची घरी स्थापना करा. ज्याच्या घरी गणेश पुजा होते त्याला वर उल्लेखलेले सर्व लाभते. ही उपासना श्रध्देने करावी.

आता ऑगस्ट महिन्याचे राशीभविष्य पाहू.


मेष रास: अश्विनी नक्षत्रावर जन्म असलेल्या व्यक्तींना आई संदर्भात एखादी घटना या महिन्यात चटका लावेल. प्रकृती बिघडेल.  राशीचा मालक मंगळ नीच राशीत बसल्यामुळे नेहमी मिळणारे हुकमी यश या महिन्यात मिळणार नाही. शत्रु कुरघोडी करतील. हा महिना शत्रुचा आहे असे समजा. शत्रुला धाडसाने प्रतिकार करु नका. नोकरी व्यवसायात तुमच्या हितशत्रुच्या कारवाया सोडता, व्यवसाय वृध्दीच्या दृष्टीने महत्वाचे घडणार नाही. किंबहुना अडचणी तशाच राहतील. महिनाभर वहाने हळु चालवा. वीजेशी खेळु नका. महिलांना बहिणी माहेरवाशीणी श्रावणात भेटुन आनंद होईल.

वृषभ रास : या महिन्यात काही जास्त रक्कम हाती येईल ती व्यवस्थित गुंतवा हे सांगण्याची गरज वृषभेच्या लोकांना नसते. भावंडे या महिन्यात कशी वागु शकतात याचा नमुना पहायला मिळेल. मुलांकडे या महिन्यात जरा लक्ष देऊन त्यांचे बरोबर चालले आहे ना हे पहा.  भेळ-पुरी, वडा-पाव सारखे बेत या महिन्यात वारंवार येतील पण पावसाळी हवेत त्याचा अतिरेक होऊ देऊ नका अन्यथा अरोग्य बिघडेल. जोडीदाराच्या मानसीक स्वास्थाची या महिन्यात काळजी घ्या.

मिथुन रास: या महिन्यात महिला असाल तर जरा जास्त काळ आरश्यासमोर असाल. या निमीत्ताने पुरुषांना यावर विनोद करायचे सुचेल. लिखाण पुर्ण करायचे असल्यास १३ ऑगस्ट पर्यंत संपवा. बुध वक्री झाल्यावर सुचेलच असे नाही. कर्केचा मंगळ कुटुंबात कपात वादळे आणेल. बुध्दीमत्ता वापरुन अशी वादळे थांबवण्याचे कौशल्य तुमच्या कडे आहेच. दिर्घकाळ असलेले एखादे दुखणे महिनाभरात मोठे होणार तर नाहीना या कडे लक्ष द्या.

कर्क रास : या महिन्यात नोकरी/व्यवसायात तुम्हाला नको असलेला संघर्ष करायचे बळ येईल. यामुळे आर्थिक नुकसान होत नाही ना या कडे पहा. महिनाभर मनस्ताप आहेच पण ७ आणि ८ ऑगस्टला परमवधी आहे असे या महिन्याचे चित्र आहे. लहान भावंडे असतील तर त्यांचे या महिन्यात काहीतरी प्रश्न निर्माण होतील आणि तुम्हाला लक्ष द्यावे लागेल.

सिंह रास : राशीचा मालक रवि १६  तारखेपर्यंत अनुकूल नाही. यानंतर मात्र महिनाभर तुम्हाला बळ मिळत आहे. वर्षातून एकदाच राशीचा मालक राशीत आल्याने तुम्ही सिंहगर्जना करुन सर्वांना आपले स्थान दाखवून द्याल. कर्क राशीत मंगळ ही महिनाभर तिथेच मुक्काम ठोकून आहे. त्यामुळे मनासारखे घडणार नाही. पण नाराजी व्यक्त करायला योग्य काळ १६ तारखेनंतरच आहे.   १३ तारखेपर्यंत पैशाची आवक मात्र समाधानकारक राहिल इतकाच काय तो दिलासा. २१ तारखेनंतर खर्चात वाढ होणार आहे पण सिंह राशीच्या मालकाला खर्चाची चिंता नसते.

कन्या रास: कन्या रास आधीच निर्णय घ्यायला कमकुवत असते. त्यात राशीचा स्वामी आणि कर्म स्थानाचा स्वामी सिंह राशीत असल्यावर मती कुंठीत होईल. शेअर मार्केट मधली गुंतवणुक तपासुन योग्य निर्णय घ्या. तुमचा सल्ला आजवर उत्तम समजला जायचा त्याकडे दुर्लक्ष होईल. यात तुमचा काय दोष आहे ? १३ तारखेनंतर नेमके शब्द सुचणार नाहीत असे ग्रहमान आहे. कुटुंबातल्या एखाद्या महिला व्यक्तीसंदर्भात भाग्यकारक घटना घडेल ही ह्या महिन्याची चांगली बाजु आहे.

तुळ रास : हा महिना तुम्हाला चांगलाच जाणार आहे. नोकरी /व्यवसायात जरा संघर्ष असेल पण कधी ज्याचा मागमुस नाही अश्या संधी चालून येतील. २३ ऑगस्ट नंतर त्यावर प्रत्यक्ष काम सुरु होईल. या महिन्यात तुम्हाला काही अधिकारही चालून येतील. त्याच बरोबर काही नको असलेला त्रास ही आहे. व्यावसायीकांना आवक चांगली राहील. वैवाहीक जोडीदाराचे मन कसे ओळखायचे आणि त्याची नाराजी कशी दुर करायची यावर मी काय तुम्हाला मार्गदर्शन करणार ?

वृश्चिक रास : जोडीदाराच्या आरोग्याकडे लक्ष द्या. गुप्त गाठी भेटी ची संधी चालून येईल आणि काही खलबते होतील. हा तुमचा स्वभाव आहे आणि अस्त्रही आहे. या महिन्यात मात्र डाव यशस्वी होणे कठीण आहे.  १६ ऑगस्टनंतर मात्र तुम्हाला अपेक्षीत घडेल. दशमात बलवान रवि आल्याने १६ ऑगस्ट नंतर महिनाभर  नोकरीत तुम्हाला काही खास अधिकार मिळतील. तुमचे वरिष्ठ ही तुम्हाला " तु सांग तसे करु " असे म्हणुन मान देतील. एखादी अनेक वर्षे न पुर्ण झालेली मागणी ह्या अधिकारात मागुन घ्या.

धनु रास : महिना जरा रोमॅन्टीकच असेल. पुरुष असाल तर हा अनुभव लक्षात राहील कारण धनु राशीची व्यक्ती काही अगदीच अरसिक नसते.  १३ तारखे पर्यंत उत्तम कार्यसिध्दीचे योग आहेत. आपले मित्र आणि शत्रु देखील मदत करतील. पुरुष असाल तर स्त्रीया आपल्या मदतीला येतील असे ग्रहमान आहे. नविन व्यावसायिक प्रस्ताव येतील.  संततीची किंचीत चिंता निर्माण होईल.

मकर रास : जोडीदाराबरोबर काही मतभेद होतील पण फ़ार काळ टिकणारे नाहीत. दिर्घ काळ प्रयत्न करुन एखादे अपेक्षीत यश या महिन्यात हातचे जाईल. आज ना उद्या तुम्ही ते परत मिळवणार हा तुमचा स्वभाव आहे पण या महिन्यात जरा निराशा येईल.  महिनाभर आरोग्याकडे लक्ष द्या. किंचीतही प्रकृतीत झालेले बदल नजरेआड न करता वैद्यकीय सल्ला घ्या. काट्याचा नायटा व्हायला नको. शैक्षणीक क्षेत्रात काम करणार्या व्यक्तीना महिना अखेरीला एखाद्या अपेक्षीत गोष्टीचे फ़ळ मिळेल.

कुंभ रास : महिना सुखाचा असल्याचा भास होईल. मागील महिन्यात जर काही आरोग्याचे प्रश्न निर्माण झाले असतील तर ते सुटतील . रोजचेच प्रवास सुखदायक असतील असे या महिन्यात जाणवेल. लांबचा प्रवासही घडण्याची शक्यता आहे.  आपण काय लिहितो कशावर सही करतो या कडे दुर्लक्ष नको की  तुमच्या नको त्या ठिकाणी लिहण्याने , सही करण्याने काही आफ़त ओढवेल. या करिता कितीही इच्छा झाली तरी फ़ेसबुक व व्हॉट्स अप वर लुज कमेंट नको.

मीन रास : महिनाभर सुखशय्या मिळणार आहे. सुख स्थानी असलेला शुक्र तुम्हाला अनेक सुख या महिन्यात देणार आहे. याचा अर्थ असा की सुखाची साधने असली तरी अनेकांना सुख अनुभवायला वेळ नसतो अशांना नक्कीच उसंत आहे. ज्यांना नोकरी हवी आहे त्यांना नोकरी मिळण्याचे योग आहेत. काहींना परदेश गमनाचे योग आहेत. काही लोकांच्या बाबतीत या महिन्यात काही महत्वाचे घडणार नाही याचा अर्थ विचारच करायचा नाही असे नाही. हा काळ प्लॅनिंग साठी उपलब्ध आहे. आराखडे तयार करा.

शुभंभवतु

जुलै २०१७ चे राशीभविष्य तसेच शनि वक्रिमार्गाने वृश्चिक राशीत आला आहे त्याचे परिणाम विवीध राशींना काय परिणाम होईल याबाबत माहिती.

नमस्कार ज्योतिषप्रेमी लोकहॊ, आजकाल २० तारीख आली की ज्योतिषप्रेमी लोकांना वेध लागतात पुढील महिन्याच्या राशीभविष्याचे. मला लोक आठवण करतात आणि हे ही सुचवतात जसे एका सन्माननीय वाचकाने सुचवले की मागील महिन्यात शनि वक्री होऊन पुन्हा वृश्चिक राशीत गेला त्याचे फ़ळ विवीध राशीच्या लोकांना काय मिळेल ? अनेकदा हा प्रश्न असतोच की एखादा ग्रह वक्री होऊन राशीत जातो तेव्हा आणि मार्गी असताना राशीत जातो तेव्हा मिळणारी फ़ळे वेगळी असतात का ? याचे उत्तर हो आहे. नेमके कसे ते ज्याच्या त्याच्या पत्रिकेवरुन जास्त विस्ताराने सांगता येईल.

 आत्ता इतकेच सांगावेसे वाटते की तूळ राशीला २६ अक्टोबर २०१७ पर्यंत पुन्हा साडेसाती आहे हे लक्षात घ्यावे. मकर राशीची २६ अक्टोबर २०१७ पर्यंत तात्पुरती शनिच्या साडेसातीपासून सुटका झाली आहे. वृश्चिक राशीत ज्यांचे जन्मनक्षत्र  जेष्ठा नक्षत्र आहे त्यांना खासच परिणाम दिसेल. धनू राशीला पीडा आहे तशीच असेल.

पुढील काही महिने वृश्चिक राशीत ज्यांचे जेष्ठा नक्षत्र आहे अशा व्यक्तींनी कशाचेही क्रेडीट घ्यायला जाऊ नये. ( माझ्या मुळे हरबरा टरारुन वर .... वर्हाड निघालय लंडनला मधला प्रसिध्द डायलॉग ) ते क्रेडीट राहूदे बाजूला जास्त मानहानी पदरात पडेल. वृश्चिक राशीचे लोक आपला अनुभव कोणीही कळवणार नाही हे मला माहित आहे. वृश्चिक राशीचे लोक तर अपमान झाला हे कुणालाही सांगणार नाहीत. पण दुखावले जाल हे नक्की.

काही ज्योतिषांनी सिंह राशीला छोटी पनवती आहे असे म्हणले आहे ते बरोबर आहे पण सिंह राशीवरच्या उत्तरा नक्षत्रावर जन्मलेल्या काही लोकांना याचा थोडासा परिंणाम जाणवेल. जेष्ठा नक्षत्राच्या समोर वृषभेच्या मृग नक्षत्रावर जन्मलेल्या व्यक्तीला जाणवेल तसेच कुंभेच्या पुर्वाभाद्रपदा नक्षत्रावर जन्मलेल्या काहीच व्यक्तीना जाणवेल. थोडक्यात या काळात शनिबरोबर अंशात्मक केंद्र योग होत असलेल्या ग्रहांना ( उत्तरा नक्षत्रातला चंद्र आणि पुर्वाभाद्रपदा नक्षत्रातला चंद्र किंवा तिथे असलेले ग्रह ) व अंशात्मक युती व प्रतियुती होत असलेले चंद्र अनुक्रमे जेष्ठा नक्षत्र किंवा इतर ग्रह आणि मृग नक्षत्रातला चंद्र किंवा तिथे असलेले इतर ग्रह यांना शनि अशुभ फ़ळे देईल.

वर सांगितलेल्या नक्षत्राच्या लोकांनी जर नवग्रह पीडा हर स्तोत्रामधला शनिची पीडाहरण करणारा मंत्र म्हणला तर निश्चित पीडेची तीव्रता कमी होईल. तो मंत्र असा आहे.

सूर्यपुत्रो दीर्घदेहो विशालाक्ष: शिवप्रिय:।
दीर्घचार: प्रसन्नात्मा पीडां हरतु मे शनि:।।

हा मंत्र शनि साडेसाती संपेपर्यंत तुला, वृश्चिक व धनु राशीच्या लोकांनी जप करायचा आहे. या राशी शिवाय वर उल्लेख केलेल्या उत्तरा (सिंह राशी ) , पुर्वाभाद्रपदा ( कुंभ राशी ) आणि मृग ( वृषभ राशी ) नक्षत्रावर जन्मलेल्या लोकांना जर मानसीक पीडा किंवा त्यांच्या आईला त्रास होतो आहे असे वाटल्यास दररोज २१ वेळा करावा. त्रास वाढल्यास हा मंत्र दररोज १०८ करावा.

वरील नक्षत्रात चंद्राशिवाय दुसरेही ग्रह असतात अश्या व्यक्तींना या ग्रहांशी होणार्या शनिच्या अशुभ योगाचे परिणाम काय होतील हे ज्योतिषीच सांगु शकतील. ही शक्यता काही मोजक्या लोकांच्या कुंडलीत असेल त्यांनी ज्योतिषाचा सल्ला घ्यावा. ज्यांच्या कुंडलीत असे योग नाहीत त्यांनी नाहक भिती बाळगु नये.

जेष्ठा, मृग, उत्तरा आणि पुर्वाभाद्रपदा असलेल्या लोकांनी आपले अनुभव कळवा. ब्लॉगवर लिहा किंवा इमेल करा. राशीभविष्य सर्वांनाच अनुभवाला येत नाही हे खरे आहे पण ह्या काळात मोजक्या लोकांना अनुभव येऊ शकतात.

या वरच्या माहितीवरुन आपल्या लक्षात आले असेल की आपल्याला राशीसोबत आपले जन्मनक्षत्र अर्थात आपल्या कुंडलीत चंद्र ज्या नक्षत्रात आहे ते नक्षत्र माहित असावे म्हणजे राशीभविष्य आपल्याला नक्की अनुभवला येईल की नाही हे लगेचच समजेल.

मेष रास : या महिन्यात ग्रहमान अनुकूल नसल्याने प्रॉपर्टीच्या कामात अडथळे येतील. १६ जुलै पुर्वीच प्रॉपर्टीची कामे मार्गी लावा. या महिन्यात मानहानी सुध्दा पत्करावी लागेल. ६ जुलै ते २० जुलै हा काळ मानहानी होऊ नये म्हणुन लक्ष देण्याचा काळ आहे.   मुलांच्या प्रगतीत अडथळे जाणवतील पण घाबरुन जाण्याचा तुमचा स्वभाव नाही. आपल्या जवळच्या मित्रांशी सर्वच बाबतीत या महिन्यात चर्चा करायला विसरु नका. मित्र नक्कीच काही मार्ग सुचवतील. २० जुलैनंतर कुटुंबातल्या कोणालाही तुमच्या खास स्वभावानुसार रागाने डाफ़रु नका. घरातली माणसे सुध्दा कधीतरी राग मनात ठेवतात. पत्नी खासकरुन तुमच्या डाफ़रण्याने मनात राग धरेल. तुमची रास काही रोमॅंटीक नाही. हा रुसवा काढणे तुम्हाला सहज जमणार नाही. त्यापेक्षा तुमच्या रागावर नियंत्रण ठेवा.

वृषभ रास : महिनाभर ग्रहमान संमिश्र असले तरी फ़ारसे प्रतिकूल नाही. उतरार्धात मुलांची प्रगती आणि जोडीदाराची मानसीकता यामुळे थोडे मन खट्टू होईल. पुर्वार्धात काही पैसे शिल्लकीत येतील त्याची गुंतवणुक करा हे तुमच्या राशीच्या मंडळींना सांगायला नकोच. २१ जुलै नंतर विद्यार्थ्यांना शिक्षणाच्या उत्तम संधी चालून येतील. पालकांच्या किंवा तज्ञांच्या सल्याने निर्णय घ्यावा. मृग नक्षत्रात चंद्र असेल तर आपल्याला मानसीक पीडा आहे त्यातही ज्यांचे चवथे चरण आहे त्यांना अनुभव जास्त येईल.  उपाय वर दिलेलाच आहे. मग चिंता करु नका.

मिथुन रास:  या राशीच्या  लोकांना महिन्याच्या उतरार्धात  धनलाभ होईल. महिनाभर नेहमी्पेक्षा जास्त खर्चही  असेलच पण गोळाबेरीज होऊन काही पैसे शिल्लकच राहीलेले दिसतील. तुमच्या स्वभावानुसार याला फ़ारसे तुम्ही महत्व देत नाही पण तुमचा जोडीदार याकडे तुमचे भविष्य वाचून लक्ष देईल ही अपेक्षा आहे.

कर्क रास: पुनर्वसु नक्षत्रावर जन्मलेल्या व्यक्तींना या महिन्याचा उतरार्धात मानसीक थोडी चिंता आहे.  अशुभ मंगळाचे भ्रमण ह्या महिन्यात उतरार्धात तुमच्या राशीला आहे. चंद्र व मंगळ हा एक लक्ष्मी योग मानला गेला आहे. पैशाची आवक वाढण्याच्या दृष्टीने सर्व ग्रहमान अगदी अनुकूल आहे पण त्याच्या जोडीला तो चिंताही घेऊन येणार आहे. गंमत आहे ना पैसे नाहीत त्यांना ही चिंता आणि नाहीत त्यांनाही. यावर पर्याय एकच चिंतारहीत जगण्याचा अभ्यास करणे.

सिंह रास : कर्म स्थानी महिनाभर असलेला शुक्र तुमच्या कामासंदर्भात असलेल्या अडचणींची सोडवणूक करणार आहे. तुम्ही प्रयत्न करा नोकरी व्यवसायातले अनेक प्रश्न या महिन्यात हातावेगळे होतील. जरा महिन्याच्या सुरवातीलाच जोर लावा. पुर्वार्ध जरा या दृष्टीने जास्त अनुकूल आहे. उतरार्धात तुमच्या राशीचा स्वामी बाराव्या स्थानी गेल्याने अनुकूल रहाणार नाही. ही स्थिती महिनाभर असेल यासाठी पुर्वार्धात कामाच्या ठिकाणी जास्त लक्ष देऊन कामे मार्गी लावा. आपले नक्षत्र उत्तरा असेल तर काय करावे हे वर दिलेले आहे.

कन्या रास : महिनाभर लाभ स्थानी  बुध, मंगळ आणि रवि हे ग्रह थोडे पुढे मागे प्रवेश करत आहेत. नोकरीत बढतीचे योग असल्यास सुवार्ता कानी पडेल. सरकारी नोकरांना बढतीचे कळले तरी लांब गावी बदली नाही ना ही चिंता असतेच. पण बहुतेकांना आहे त्याच ठिकाणी किंवा सोयीच्या ठिकाणी प्रमोशनवर बदली मिळावी असे ग्रह संकेत आहेत. सरकारी नोकरांनी बढतीचे संकेत येताच बदली योग्य ठिकाणी व्हावी यासाठी सेटींग करा.

तूळ रास : संघर्ष टाळावा हा तुमचा स्वभाव असला तरी या महिन्यात ११ जुलै नंतर नोकरी व्यवसायात संघर्ष अटळ आहे. या संघर्षात तुमची पत आणि प्रतिष्ठा पणाला लागेल असे ग्रहमान आहे. हाताखालच्या लोकांवर फ़ारसा विश्वास ठेऊ नये परंतु नोकरीत असाल तर वरिष्ठ मात्र तुम्हाला अडचणीत आणणार नाहीत. तुमच्या राशीचा मित्र असलेला ग्रह बुध तुम्हाला मदत करेल.  हुशारीने आपली सोडवणुक करुन घ्या.

वृश्चिक रास : हा महिना जोडीदाराबरोबर सुखसंवाद करण्याचा आहे. हा एक भाग सोडला तर राशीचा स्वामी मंगळ आपल्या नीच राशीत जात असल्याने सर्व काही मनासारखे घडेल असे नाही.  जेष्ठा नक्षत्र असलेल्यांनी खास करुन चवथे चरण असलेल्यांनी वरील शनिच्या वक्री होण्याचे परिणाम वाचा. पुर्वार्धापेक्षा महिन्याचा उतरार्ध बरा असेल. एकंदरीत ग्रहमान फ़ारसे अनुकूल नाही असे चित्र या महिन्याचे आहे.

धनू रास : कर्म स्थानी मागच्या महिन्यात मार्गस्थ झालेला तुमच्या राशीचा स्वामी गुरु तुम्हाला कर्म करत रहाण्याचा आदेश देतो आहे. सध्यातरी फ़ळाची अपेक्षा करु नका. ग्रहमान फ़ारसे अनुकूल नसले तरी या महिन्यात केलेले काम वाया मात्र जाणार नाही. आठव्या स्थानी जाणारा रवि आणि मंगळ आरोग्याबाबत काळजी घ्यायला सांगत आहेत. धनु राशीला चंद्र जेव्हा कर्केत असतो ते दिवस मनस्तापाचे असतात. या महिन्यात त्या चंद्राच्या जोडीला अशुभ मंगळ आहे. २२, २३ आणि २४ जुलै ह्या तारखांना हा अनुभव जास्त वाईट असेल. आईच्या माहेरच्यांकडुन  काही सुखद वार्ता येतील हा ह्या महिन्यातला चांगला भाग आहे.

मकर रास : तुमची साडेसाती येता येता राहीली आहे. व्यावसायीक असाल तर या महिन्यात अनेक प्रस्ताव येतील त्यावर विचार करुन निर्णय घ्या. तुमच्या राशीला शुक्र या महिन्यात बलवान आहे. त्याचा फ़ायदा घेऊन काही नोकरी व्यवसायातले निर्णय घ्या. कलाकार असाल तर ह्या महिन्यात आपल्या हातुन एक सुंदर कलाकृती निर्माण कराल. गायक/वादक  असाल आणि संधी शोधलीत तर आपली कला अनेक काळ लोक स्मरणात ठेवतील अशी बहारदार मैफ़ील जमून येईल.   वैवाहीक जोडीदार उतरार्धात नाराज होईल तर त्यावर उपाय शोधून ठेवा.

कुंभ रास :  शनि वक्री होऊन कर्म स्थानी आल्याने नोकरी व्यवसायात जरा कष्टदायक परिस्थिती निर्माण होईल. पण शनिच्या राशीला खास करुन कुंभ राशीला बुध्दीचा वापर करुन प्रश्न सोडवण्याचे वरदान आहे हे लक्षात ठेवा. यातही शुक्राचे भ्रमण चतुर्थात असल्याने घरी आल्यावर ह्या कष्टाचे काहीच वाटणार नाही असे सुखद अनुभव महिनाभर घरी असताना येतील. २२-२३-२४ जुलैला अपघातापासुन स्वत:ला जपा.  मी रिस्क घेणार नाही येवढा मंत्र जपा. अपघाताच्या शक्यता कमी होतील

मीन रास : महिनाभर ग्रहमान संमिश्र आहे. तुमच्या विचारांना चालना मिळेल. अनेक गोष्टींवर सखोल विचार करण्यास अनेक पर्यायी विचार समोर येतील. चांगले प्लॅनिंग करण्यास अनुकूल महिना नक्कीच आहे. भावंडे खास करुन बहिणीकडुन आनंददायक बातमी या महिन्यात मिळेल. बहीणीबरोबर काही काळ आनंदात घालवाल असे योग या महिन्यात आहेत.

जून महिन्याचे राशीभविष्य आणि पावसाचे प्रमाण

जून महिना सुरु झाला की पावसाच्या आगमनाची वाट आपण पहातो. तापलेल्या भुमीवर पावसाचे आगमन होताच मातीचा गंध मनाला मोहवून टाकतो. तापलेल्या वातावरणाला अंमळ थंडावा मिळुन एक आल्हाददायक अशी हवा तयार होते. आपण नोकरदार असलो आणि तरी पावसाचे स्वरुप काय असेल हा प्रश्न शेतकरी नसलेल्यांना सुध्दा असतो. शेती पिकली तरच महागाई नियंत्रणात रहाते हे आता आपल्याला माहित झाले आहे.

कसे असेल पावसाचे प्रमाण ? 

पर्जन्य नक्षत्रांची वाहने ठरविण्याचा नियम असा आहे. ” सूर्य ज्या नक्षत्रात प्रवेश करील त्या नक्षत्रापासून प्रवेशकालीन चंद्र नक्षत्रापर्यंत नक्षत्र संख्या मोजावी, त्या संख्येस नऊने भागावे. जी बाकी राहील त्यावरून वाहने जाणावी.”
१ घोडा, २ कोल्हा, ३ बेडूक, ४ मेंढा, ५ मोर, ६ उंदीर, ७ म्हैस, ८ गाढव आणि शून्य बाकी राहिली तर हत्ती वाहन असते. बेडूक, म्हैस,हत्ती वाहन असता खूप पाऊस पडेल, मोर, गाढव, उंदीर वाहन असता मध्यम पाऊस पडेल,घोड़ा वाहन असता पर्वतक्षेत्रात पाऊस पडेल आणि कोल्हा, मेंढा वाहन असता पाऊस ओढ़ लावील असे सांगण्यात आले आहे. सूर्य- चंद्र नक्षत्रांवरून आणखीही काही नियम सांगण्यात आलेले आहेत.
 यावर्षीच्या पर्जन्य नक्षत्रांचा काल आणि वाहने पुढीलप्रमाणे आहेत.
१. मृग- ८ जून २०१७ ते २१ जून २०१७ , वाहन – मेंढा - कमी पाऊस
२. आर्द्रा – २१ जून  २०१७ ते ५ जुलै २०१७, वाहन – म्हैस- खुप पाऊस
३. पुनर्वसू –  ५ जुलै २०१७  ते १९ जुलै २०१७ , वाहन – कोल्हा - कमी पाऊस
४. पुष्य – १९ जुलै २०१७  ते २ ऑगस्ट २०१७, वाहन – उंदीर - मध्यम पाऊस
५. आश्लेषा – २ ऑगस्ट २०१७ ते १६ ऑगस्ट२०१७ , वाहन – घोडा - पर्वत क्षेत्रात पाऊस
६. मघा – १६ ऑगस्ट २०१७  ते २९ ऑगस्ट २०१७ , वाहन – मेंढा - कमी पाऊस
७. पूर्वा फाल्गुनी – ३० ऑगस्ट२०१७  ते १३ सप्टेंबर २०१७ , वाहन- गाढव -मध्यम पाऊस
८. उत्तरा फाल्गुनी – १३ सप्टेंबर २०१७ ते २६ सप्टेंबर २०१७ , वाहन- बेडुक -खुप पाऊस
९ हस्त – २६ सप्टेंबर २०१७  ते ९ ऑक्टोबर २०१७ , वाहन – उंदीर - मध्यम पाऊस
१०. चित्रा – १० ऑक्टोबर २०१७  ते २२ ऑक्टोबर २०१७ , वाहन – घोडा -पर्वत क्षेत्रात पाऊस
११. स्वाती – २३ ऑक्टोबर २०१७ ते ५ नोव्हेबर २०१७ , वाहन – मेंढा - कमी पाऊस

एकूण पावसाच्या मौसमाच्या अंदाजाची गोळाबेरीज केली तर पावसाच्या पाच महिन्यापैकी खुप पाऊस एक महिना, दोन महिने मध्यम पाऊस आणि दोन महिने कमी पाऊस असे योग आहेत. हवामान खाते सुध्दा ९० % पेक्षा अधीक पावसाचा अंदाज सांगते आहे. हे पहाता एकंदरीत पाऊस चांगलाच आहे असे म्हणता येईल.

मेष रास : राशीचा मालक मंगळ मिथुन ह्या राशीत महिनाभर असल्यामुळे आपल्या आक्रमक स्वभावानुसार आपण कठोर शब्द बोलून लोकांना दुखावाल. यातून काहीच साध्य होत नाही यास्तव यावर नियंत्रण ठेवा. मंगळ आणि शनि अशुभ योगामुळे महिन्याच्या सुरवातीला आरोग्य संभाळा. ९ तारखेला गुरु मार्गी झाला की अनेक रेंगाळलेल्या गोष्टी मार्गी लागतील.  महिनाभर सप्तमेश शुक्र हर्षलच्या युतीत आल्याने अविवाहीतांच्या आयुष्यात काही ठळक गोष्टी घडतील.

वृषभ रास: राशीचा मालक शुक्र महिनाभर अनुकूल नाही. वृषभ राशीला राजयोग कारक शनिसुध्दा वक्री आहे. एकटा बुध अनुकूल असल्याने सर्व कामे बुध्दीचा वापर करुनच मार्गी लागतील. यशाकरता जास्त प्रयत्न महिनाभर करावे लागतील.  ९ तारखेला गुरु मार्गी झाल्यावर पैशाचे प्रश्न असतील तर  मार्गी लागलेले दिसतील. महिनाभर तुमच्या व्यक्तिमत्वात बदल झाल्याचे लक्षात येईल.

मिथुन रास : राशीचा मालक बुध १४ तारखेनंतर अनुकूल होऊन उर्वरित महिनाभर यश देताना दिसेल. ९ तारखेला गुरु मार्गी झाल्यानंतर नोकरी व्यवसायाच्या कामात वेग येऊन अपेक्षीत गोष्टी घडुन येतील. विद्यार्थ्यांना जून केलेल्या अभ्यासाचे फ़ळ म्हणुन अपेक्षीत निकाल हातात येऊन आनंद होईल. लग्नी मंगळ महिनाभर असल्यामुळे चिडचिड होणे स्वाभावीक आहे. तुमच्या विनोद निर्माण करण्याच्या स्वभावाने तुम्हीच यावर विनोद कराल आणि चिडचिड कमी कराल.

कर्क राशी : राजयोगकारक मंगळ अनुकूल नाही. नविन शोधुन काढलेले व्यावसायीक गणिते फ़ेल होतात की काय अशी शंका मनात येईल. भाग्येश गुरु ९ जून ला अनुकूल होत आहे. व्यावसायीक असाल तर आर्थिक लाभाचे प्रमाण वाढेल. विवाह इच्छुक असाल तर काही नविन ओळख या महिन्याभरात होऊन त्याचे रुपांतर नात्यात व्हावे अशी भावना महिना अखेरीस निर्माण होईल.

सिंह रास : तुमचा जन्मच मुळात अधिकार मिळवण्यासाठी झालेला आहे. या महिन्यात राशीचा मालक तुमच्या कर्मस्थानात येतो आहे. दरवर्षी तुमच्या अधिकारात वाढ करणारा महिना म्हणजे जून. अधिकार वाढीची ऑर्डर होऊन अनेक दिवस झालेले असतील तरी हा अधिकार मानून त्या प्रमाणे लोक कृती करतात याचा अनुभव या महिन्यात तुम्हाला येईल. लोक तुमच्या अधिकाराला मान देतील.

कन्या रास : शंका आली नाही असा दिवस जात नाही हा आपला स्वभाव असला तरी ह्या महिन्यात बुधाच्या शुभ भ्रमणाने आपल्या अनेक शंका दुर होतील. ज्या गोष्टींचे आपले ज्ञान अर्धवट आहे असे वाटते त्या विषयात खुप ज्ञान मिळेल. चिकीत्सा करुन अजून ज्ञान मिळवण्यास आपण तयार व्हाल. वजन वाढणे ही तुमच्या शरीराची प्रवृत्ती नाही पण काळजी घ्या.

तुला रास : राशीचा अधिपती महिनाभर व्यापार संधी उपलब्ध करुन देणार आहे. अनेक व्यापारी प्रस्ताव किंवा करार तुमच्या समोर येतील यावर विचार पुर्वक निर्णय घ्याल. जोडी्दाराबरोबर गुज करायला ह्या महिन्यात वेळ ही आहे आणि मुड ही असणार आहे त्यामुळे सुखावणार आहात. शरीर प्रकृतीत किंचीत बिघाड व्हावे असे ग्रहमान आहे त्यामुळे महिन्याच्या पुर्वार्धात काळजी घ्या.

वृश्चिक रास : शत्रु राशीत आणि राशीपासुन आठव्या स्थानी राश्याधिपती मंगळाचा मुक्काम असल्याने फ़ारसे मनासारखे घडेल अशी अपेक्षाच ठेऊन नका. पंचमेश गुरु वर्षभर लाभस्थानी आहे. ९ जून पासुन तो मार्गी होत आहे हीच जमेची बाजू आहे. जेष्ठा नक्षत्रावर जन्मलेल्या व्यक्तींना साडेसातीचा त्रास महीना अखेरीस जास्त सुरु होऊ शकतो यास्तव शनि उपासना करा. साडेसातीचा हा थोडासा त्रास आहे जो सप्टेंबर मधे कमी होऊन जाईल.

धनु रास : राश्याधिपती गुरू ९ जूनला मार्गी होत आहे. आळस झटकून पळायला तयार व्हा. दशमात मार्गी  गुरु असला म्हणजे कार्यभार वाढतो याचे प्रत्यंतर पुढील दोन -तीन महिने राहील. सहाव्या स्थानी असलेला रवि आपली नविन कामे समोर येतील. काही कारणांनी पुर्वी आलेले प्रस्ताव आपण किंवा आपल्या समोरच्या व्यक्तींनी स्विकारले नसतील तर त्यावर पुनर्विचार या महिन्यात होईल.अविवाहीतांना आपल्या चांगल्या मित्रात किंवा मैत्रीणीत इंटरेस्ट निर्माण होईल.

मकर रास : महिनाभर शुक्र तुमच्या सुख स्थानात आहे. सतत कार्यरत असणे हा तुमचा स्वभाव बाजूला ठेऊन जरा उपलब्ध सुखाचा उपभोग घ्या. शांत पणे घरात बसून जमवलेल्या सुखसाधनांना आनंद घेता येईल असे ग्रहमान आहे. वहानातुन जरा फ़ेरफ़टका मारा आणि आपणच कमावलेल्या सुखसाधनांचे सुख काय असते ते अनुभवा. सहाव्या स्थानी असलेला मंगळ आपल्या शत्रुला नियंत्रणात आणेल. जुने दुखणे सुध्दा औषधौपचाराने नियंत्रणात आलेले दिसेल.

कुंभ रास : महिनाभर शुक्र तुमच्या तिसर्या स्थानी महिनाभर असणार आहे. तिसर्या स्थानाचा स्वामी मंगळ पाचव्या स्थानी आहे. बुध ही मिथुनेत येत आहे. तुम्हाला लिखाणाची स्फ़ुर्ती होणार आहे. प्रयत्न पुर्वक मनात येत आहे ते कागदावर उतरवा. तुमची रास बौध्दीक रास आहे त्यामुळे हा आनंद काही वेगळाच असेल.

मीन रास : सप्तमेश बुध शुक्राच्या राशीत असताना गुरुशी नवपंचम योग या महिन्याच्या सुरवातीला होत आहे. विवाह इच्छुक असाल तर या सिझनचा हा जोरदार योग आहे. ९ तारखेला गुरु मार्गी झाला म्हणजे या प्रक्रियेला वेग येणार आहे. तुमच बाशींगबळ जोरात असेल तर झट मंगनी पट शादी.  मग काय ठरवताय ?

संपुर्ण मे महिन्याचे राशीभविष्य

नमस्कार ज्योतिष प्रेमी लोकहॊ. मेषेत हर्षल गेला आणि भारतात अतिरेकी कारवायांना जोर चढला आहे. जम्मु काश्मीरच्या मुख्यमंत्री पंतप्रधान मोदींना भेटत आहेत तोवर माओवाद्यांच्या हल्ल्यात जेवायला बसलेले जवान शहीद झाल्याची बातमी येत आहे. भगव्या कपड्यात अतिरेकी घुसले असुन त्याचा आलेला इशारा अजुन एक बातमी देतो आहे. हे सर्व पुढील काही दिवस सुरु रहाणार आहे. जेव्हा  म्हणजे कर्क ह्या नीच राशीत मंगळ जाईल आणि ह्या मेषेतल्या हर्षलशी अशुभ योग करेल तेव्हा ह्या अतिरेकी कारवायांनी भारत हदरलेला असेल. असो ही सर्व तिसर्या महायुध्दाकडे वाटचाल आहे असे अनेक ज्योतिषी म्हणत आहेत. याचे प्रत्यंतर लवकरच येईल. भारत या युध्दात ओढला जायला मात्र अजुन काही वर्षांचा कालावधी जावा लागेल.

आता संपुर्ण मे महिन्याचे राशी भविष्य पाहू

मेष रास: राशीचा स्वामी मंगळ शृंगारीक वृषभ राशीत महिनाभर आहे पण जोडीदार बाहेरगावी जाण्याने विरह आहे. पण ही परिस्थीती महिनाभर असेल असे नाही.  घशाची काळजी घ्यावी. उन्हाळा आहे म्हणुन खुप आईस्क्रीम, थंड पाणी याचा अतिरेक टाळायला पाहीजे. परदेशात असाल आणि भारतात यायचा प्लॅन जमला नसेल तरी आज तंत्रज्ञान पुढे गेल्याने आपण भारतात असून समारंभात सहभागी असल्याचा आनंद घ्याल.

वृषभ रास: राशीचा मालक लाभस्थानी असल्यामुळे ऐप्रिल प्रमाणे मे महिन्यात सुध्दा मनाप्रमाणे गोष्टी घडणार आहे. काही कामे अजुनही मागे पडली असतील जरा जोर लाऊन १५ मे पर्यंत पुर्ण करा. मुले परदेशात असतील, शिक्षणासाठी बाहेरगावी असतील तर त्यांना काही मार्गदर्शनाची आवश्यकता लागेल. व्यावसायीकांना परगावाहुन/परदेशाहून व्यावसायीक प्रस्ताव येतील त्यावर विचार करा.

मिथुन रास: तरुण जर परदेशात शिक्षणासाठी जायचा प्रयत्न करत असतील तर हा महिना प्रयत्न करण्यासाठी योग्य काळ आहे.  ऑन लाईन अर्ज करायचा असेल किंवा अन्य कोणत्याही प्रोसेस करायच्या साठी योग्य काळ आहे. आपल्या लेखनाचे प्रकाशन करायचे असल्यास सुयोग्य काळ आहे. नोकरीत स्थिती मजबुत असेल. प्रमोशनचे रिपोर्ट तुम्हाला हवे तसे लिहले जातील.

कर्क रास:  शिक्षण क्षेत्रातल्या लोकांना त्यांच्या मागण्या पुर्ण होऊन त्याचे फ़ळ हाती लागल्याचा अनुभव येईल. मागच्या महिन्यात असलेली धावपळ संपुन सुखाने सुट्टी घेऊन मित्रांच्या गाठीभेटी घडतील. मागील महिन्यात नविन खरेदी केलेल्या वस्तुंचा उपभोग घ्यायला जमले नसेल तर ह्या महिन्यात ते घडेल. परदेशातुन एखादे पत्र/प्रस्ताव येणे असल्यास फ़ॉलो-अप करा.

सिंह रास: हा महिना नोकरी व्यवसायात भाग्याचा आहे. मेषेत रवि असताना अनेक गोष्टीत यश संपादन कराल. १५ मे पर्यंत ही स्थिती आहे.  तुमच्या राशीचा राजयोग कारक मंगळही कर्मस्थानी आल्याने प्रयत्नाने अनेक कामे मार्गी लाऊ शकाल. यासाठी चांगले प्लॅनिंग करा. सर्व बाबी काटेकोर पणे तपासणे मात्र आवश्यक आहे.

कन्या रास: महिनाभर नोकरी/व्यवसायात कुचंबणा होईल. यासाठी छोटासा उपाय करुन पहा. हिरवी विलायची जवळ ठेवा. हिरवी विलायची खाऊनच महत्वाच्या वेळी बोलायला सुरवात करा आणि अनुभव कळवा. व्यावसायीकांना नविन प्रस्ताव येतील त्यावर विचार करा. विद्यार्थ्यांनी परिक्षा झाल्या नसल्यास झटुन अभ्यास करायला हवा. जोडीदाराशी उत्तम संवाद होईल.

तुळ रास : तुमचा स्वभाव कर्ज घेण्याचा नाही पण चुकून झाले असल्यास या महिन्यात ते फ़ेडण्याच्या दृष्टीने मार्ग दिसेल. उच्च शिक्षण घेत असलेल्या व्यक्तींना त्यांच्या शिक्षकांच्या हट्टीपणामुळे मनस्ताप सहन करावा लागेल. जोडीदाराशी जरा विसंवाद झालाच तर मार्ग कसा काढायचा हे सांगाण्याची आवश्यकता तुम्हाला नाही. महत्वाचे निर्णय जरा विचारपुर्वक घ्या.

वृश्चिक रास:  शत्रु पक्ष तडजोडीचे प्रस्ताव घेऊन येईल त्यावर विचार करुन निर्णय घ्या. माझे तुझ्यावर प्रेम आहे हे सांगायला हा महिनाभर संधी येतील. तुम्हाला हे व्यक्त करायला संकोच होत असेल तर मग संधी निघून जाईल. शेअर बाजारात आत्ता मुव्ह कराल तर फ़ायद्याची ठरेल. फ़क्त सल्ला घेतल्याशिवाय रिस्क घेऊन नका. नोकरीत वरिष्ठांशी पंगा घेऊ नका.

धनु रास: राशीचा मालक आणि सुख स्थानाचा मालक गुरु वक्री आहे त्यातुन मूळ नक्षत्राला साडेसातीचा तीव्र झटका आहे. काही मनासारखे घडणे जवळ जवळ अशक्यच आहे.  मंगळ दशमात आल्याने संघर्षा शिवाय नोकरी/व्यवसायात काही घडणार नाही. गुरुची उपासना आणि शनिमहाराजांची उपासना सुरु ठेवा. काही चमत्कार घडणार आहेत याचा अनुभव कळवा.

मकर रास: तुमच्याही राशीचा मालक वक्री होऊन रुसला आहे. मनस्ताप असोत की कष्ट तुम्ही कशालाच भीत नाही म्हणुन याही परिस्थितीत तुम्ही तुमची कामे पुढे नेणार आहातच. तुमच्या राशीला शुक्र राजयोग कारक असतो तो महिनाभर पावरफ़ुल आहे मार्ग नक्की निघेल. क्रिडा प्रकारात रस घ्याल आणि याही परिस्थितीत थोडे सुख मिळवाल.

कुंभ रास: शुक्र तुमच्या कुटुंबस्थानी किंवा धनस्थानी महिनाभर आहे. शुक्र रोकड पैसा घेऊन आलेला आहे. त्याचे नीट नियोजन करा. गुढ गोष्टी तुम्हाला आवडतात. याचे आकलन होण्यासाठी जी बैठक हवी असते ती महिनाभर लाभेल. सहजपणे गुढ गोष्टींचे ज्ञान होईल. कामासाठी लहान प्रवास करावे लागतात अश्यांना या महिन्यात काही कारणाने वर्क फ़्रॉम होम ची संधी मिळणार आहे.

मीन रास : कर्म स्थानाचा अधिपती आणि राशीचा अधिपती गुरु महिनाभर वक्री असणारच आहे. घेतलेल्या कामात व्यत्यय येणारच आहे यासाठी गुरु आराधना करा म्हणजे काही महत्वाची कामे तरी मार्गी लागतील. मंगळ तुम्हाला साहस करण्याचे प्रोत्साहन देईल. स्वभावाला मुरड घालून आवश्यक तेव्हडे साहस करायला हरकत नाही. हा ही महिना फ़ार अनुकूल आहे असे नाही.