Tuesday, May 8, 2018

१४ मे ते १४ जून २०१८ चे राशीभविष्य, अधिक महिना आणि मकरेचा मंगळ

ज्योतिषप्रेमी लोकहो नमस्कार, दर महिन्यात आपण राशीभविष्य पहातो. रविचा राशीबदल गृहीत धरुन तो पहातो. या महिन्यात रवि वृषभ राशीत १४ मे २०१८ ते १४ जून २०१८ या कालात असणार आहे. याच दरम्यान मराठी अधिक जेष्ठ महिना येत असल्यामुळे कोणीतरी अशी शंका विचारेल की रविचा राशीबदल होत नाही तो अधिक महिना असे असताना मी, रवि वृषभ राशीत महिनाभर असेल अस कस म्हणतो ?

मराठी अधीक महिना १५ मे रोजी रात्री ०७ वाजून ५० मिनीटांनी सुरु होईल. तर रविचा राशी बदल १४ मे राजी पहाटे ०५ वाजून २ मिनीटांनी झालेला असेल. अधीक महिना १३ मे रोजी रात्री ०१ वाजून १३ मिनीटांनी संपेल तर  रविचा मिथुन राशीत प्रवेश १५ जून ला सकाळी ११ वाजून ३६ मिनीटांनी होईल. अधिक जेष्ठ महिन्यात रविचे राश्यांतर होत नाही म्हणुनच याला मल मास म्हणतात.

मलमासात विवाह होत नाहीत कारण त्या मासाला शुध्दी नसते. पण याचा अर्थ अधिक जेष्ठ मासात विवाहाची बोलणी करु नयेत असे मात्र नाही. विवाहाची बोलणी विनाकारण लांबवू नयेत. अधिक मासात साखरपुडा होऊ शकतो, नामकरण अर्थात बारसे होऊ शकते किंवा गृहप्रवेशही करायला हरकत नाही. फ़क्त विवाह मुहूर्त नसतात इतकेच लक्षात घ्यावे.

या काळात नविन जप, व्रत याचा आरंभ करु नये असे शास्त्र सांगते. पण आपली नित्याची पुजा, आधी घेतलेली व्रते सुरु ठेवण्यास अडचण नसते. अधिक मासात आपल्या जावयांना बोलावून त्यांना अनारसे द्यावेत, या निमीत्ताने भेट वस्तू देऊन नाते वृध्दींगत करावे.

ज्या मुलांनी पालकांच्या संमतीशिवाय विवाह केलेला आहे आणि मुलीशी /जावयाशी संबंध बिघडले आहेत अश्या पालकांनी या महिन्यात या निमीत्ताने जावयाला/लेकीला घरी बोलवून यथोचीत सन्मान करावा. ही नविन प्रथा सुरु करण्यास काय हरकत आहे असे मला या निमीत्ताने सुचवावेसे वाटते. ( लव्ह जिहाद सारख्या प्रकरणाची चाहूल लागताच मुलीला समजवा. ते घडुच देऊ नका.  ते प्रेम नाही. षडयंत्र आहे. यावर जास्त लिहीणे योग्य नाही. मी लव्ह जिहादचे समर्थन करत नाही इतकेच सांगणे आहे )

सैराट नावाचा सिनेमा मी पाहिला. त्याचा शेवट मला चटका लावून गेला. सिनेमा हे प्रबोधनाचे साधन आहे म्हणताना ऑनर किलींगच्या घटना महाराष्ट्रात जवळ जवळ नसताना, माननीय नागराज मंजुळे यांनी असा शेवट दाखवून काय मिळवले ? असा प्रश्न मला पडला होता. अधिक मासाच्या या निमीत्ताने एखाद्या कुटुंबाने, अश्या विवाह संबंधांना मान्यता देऊन जर जावयाला अधीक महिन्याच्या निमीत्ताने घरी बोलावले तर  नातेसंबंध सुधारतील. हा पायंडा, ऑनर किलींगसारख्या घटना घडु नयेत व  जातीय विषावरचा उतारा आहे असे मला वाटते. दर वेळेला प्रेमविवाह आंतरजातीय असतोच  असे नाही. अनेकदा पालकांचे अहंकार प्रेमविवाहाला मान्यता देत नाहीत. असे अहंकार म्हणजे सुध्दा नातेसंबध सुधरण्यास अडथळा आहे. तो दुर करण्यास ही संधी आहे.

२ मेला मंगळ मकर राशीत गेला आहे. तो ६ नोव्हेंबर २०१८ पर्यंत मकर राशीत असणार आहे. मकरेमधे गेलेला मंगळ ज्यांना स्वत: चे घर खरेदी करायचे आहे त्यांना फ़िरुन प्रयत्न करायचे आहेत अश्या लोकांसाठी उत्तम संधी आहे. ज्यांच्या पत्रिकेत मकरेचा मंगळ आहे त्यांना प्रॉपर्टीत वाढ करण्याची सुवर्ण संधी आहे. स्वत: चे घर होण्यास अनंत अडचणी आहेत असा ज्यांचा अनुभव आहे  त्यांनी घरातल्या सगळ्या लोकांच्या पत्रिका ज्योतिषाकडून तपासून घेऊन ज्यांच्या पत्रिकेत मकरेचा मंगळ आहे अश्या कुटुंबातील सज्ञान मुलांच्या नावाने प्रॉपर्टी खरेदी केल्यास हा प्रश्न सुटेल. यासाठी कायदा व कर सल्लागाराशी बोलूनच हे करावे.

आता १४ मे २०१८ ते १४ जून २०१८ या काळासाठी असलेले राशी भविष्य पाहू

मेष रास : गेले अनेक महिने केतू तुमच्या कर्म स्थानी येऊन बसल्याने कामाच्या ठिकाणी संघर्ष, अडथळे यात वाढ झालेली असेल अश्यात आता मंगळही या स्थानी आलेला आहे. कर्मस्थानात आता मंगळाची दाहकता डबल झाल्याने अडथळे, संघर्ष यात खुप वाढ झालेली दिसेल. थंड पडलेल्या गृह निर्माण व्यवसायाला मात्र या निमीत्ताने चालना मिळेल. जे या व्यवसायात आहेत त्यांना वेगाने कामे पुर्ण करावी लागतील. ६ नोव्हेंबर पर्यंत हा काळ आहे. शनि वक्री असल्याने कामगार मिळणार नाहीत. कोर्ट केसेस पुढे जाणार नाहीत अश्या पार्श्वभुमीवर मेष रास असलेल्या लोकांना संघर्ष करायचा आहे. २७ मे नंतर कर्ज प्रकरणे मार्गी लागतील. ८ जून पर्यंत तुम्हाला सुट्टी नाही असे ग्रहमान या महिन्यात आहे.

वृषभ रास : रवि तुमच्या राशीत महिनाभर असणार आहे. आरोग्यात सुधारणा होईल. या निमीत्ताने या महिन्यात व्यायामाची सवय लाऊन घ्या.  कुटुंबातील अपेक्षीत गोष्टी घडण्यासाठी २७ मे पर्यंत थांबावे लागणार आहे. २७ मे नंतर मुलांच्या संदर्भात काही चिंता असतील तर त्या कमी होतील. सतत प्रवास करणार्यांना या महिन्यात जरा ब्रेक मिळेल. व्यापारी वर्ग आवक कमी झाल्याने चिंतेत असतील तर १० जून ला गुरु मार्गी झाल्यावर हा प्रश्न सुटेल. कोणी आजारी असेल आणि दिर्घकाळ सुरु असलेल्या ट्रीटमेंट १० जून नंतर पुर्ण होऊन त्याचा त्रास संपेल. या निमीत्ताने होणारा खर्च थांबेल.

मिथुन रास : या महिन्याचे ग्रहमान तुमच्या राशीला फ़ारसे चांगले नाही. २७ मे पुर्वी महत्वाची कामे उरका. २७ मे ते १० जून या काळात तुमच्या राशीचा स्वामी बाराव्या स्थानी असल्याने कामे म्हणावी तशी मार्गी लागायला अडचण होईल. त्यात रवि सुध्दा महिनाभर बाराव्या स्थानी असल्याने अपमानास्पद घटना घडतील. ज्ञान ही तुमच्या जवळ असलेली महत्वाची बाब, पण त्याबाबत शंका घेतली तर तुम्हाला अपमान झाल्यासारखा वाटेल यास्तव महत्वाच्या वेळी तुमचे ज्ञान बरोबर असल्याचे पुरावे सोबत ठेवा. शाब्दीक संघर्षात तुमचा पराजय होणार नाही याची सातत्याने काळजी घ्या.

कर्क रास : शिक्षण क्षेत्रातल्या लोकांना नविन करार, व्यावसायीक शिक्षण, इंजिनीयरींग क्षेत्रात वेगळ्या संधी चालून येतील. आपले व्यावसायीक आडाखे चुकू नयेत यास्तव १० जून पुर्वी महत्वाचे विषय मार्गी लावा. ज्या लोकांना कामासाठी परदेशात रहावे लागत आहे त्यांना ८ जून कामे संपवून परत येण्याची संधी मिळणार आहे. वैवाहीक जोडीदाराशी असलेले रुसवे फ़ुसवे, ब्रेक अप्स या महिन्याच्या शेवटी संपुष्टात येऊन तुम्हाला अपेक्षित गोडवा पुन्हा निर्माण होईल.  आरोग्याचे प्रश्न, व्यावसयीक प्रश्न निर्माण होणार नाहीत ना ? यावर विचार करा.

सिंह रास : राशीचा स्वामी आपल्या दशमस्थानी आला आहे. आपण सरकारी नोकरीत असा किंवा खाजगी, या वर्षी प्रमोशन अपेक्षीत असेल तर हाच महिना महत्वाचा आहे. या महिन्यात तुमचे अ‍ॅप्रेजल किंवा कॉन्फ़िडेन्शीयल रिपोर्ट म्हणजे सी. आर. ( जो कधीच गुप्त रहात नाही ) आपल्या प्रमोशनची खात्री देणारा असेल असा बनवून घ्या. प्रमोशन अपेक्षीत नसले तरी आपल्या अधिकार क्षेत्रात वाढ देण्याचे ग्रहमान आहे. महत्वाचा निर्णय घेताना तुमचा सल्ला वरिष्ठ घेत असतील तर ते एक प्रकारे प्रमोशन आहे. सहाव्या स्थानी मंगळ दर दोन वर्षांनी येतो. याचाच अर्थ तुमच्या विरोधकांना गप्प बसविण्याची कृती करण्याचे दिवस सुरु आहेत. तुमच्या प्रमोशनच्या आड कुणी येत असतील तर त्यांना चारी मुंड्या चित करा.

कन्या रास: विनाकारण चिंता करण हा आपला स्वभावच आहे. या महिन्यात असे कारण मला दिसत नाही. विनाकारण चिंता करण्यावर अनुलोम विलोम प्राणायामासारखा  सारखा दुसरा प्रभावी उपाय नाही. तुमच्या राशीचा स्वामी २७ मे ला वृषभ राशीत गेला की एखादी चिंता असेलच त्याचे निराकरण होताना दिसेल. व्यावसायीक असाल तर अन्य मार्गाने जसे व्याज किंवा परमेश्वर कृपेने फ़ारच कमी कष्टात काही लाभ ८ जून नंतर होऊ शकतात. संतती बाबतच्या चिंता संपल्या नाहीत तरी एखादी सुवार्ता नक्कीच या महिन्यात ऐकायला मिळेल.

तूळ रास : तूळ राशीला चतुर्थात गेलेला मंगळ घरात वाद निर्माण करेल पण तुम्ही तो योग्य रितीने हाताळाल. पण प्रॉपर्टीच्या संदर्भात काही घडेल. एखादी नविन इस्टेट किंवा अद्याप स्वत: च्या घरात रहायला गेलेला नसाल तर त्या दृष्टीने सकारात्मक पाऊल उचलाल. व्यापारी असाल तर महत्वाचे सौदे २७ मे पुर्वी पुर्ण करा अन्यथा १० जून पर्यंत रखडतील. तुमच्या राशीचा मालक सध्या भाग्यस्थानी आहे जो ८ जूनला कर्म स्थानी जाणार आहे. जे काम करणे तुमच्या मनात आहे त्यावर जेष्ठांचा सल्ला घेऊन ८ जून नंतर प्रत्यक्ष कृतीत आणा. सर्व बाजुने विचार करुन घेतलेला निर्णय योग्यच ठरेल.

वृश्चिक रास : दिर्घकालीन ग्रह स्थिती फ़ारशी अनुकूल नाही असे जरी असले तरी राशीचा स्वामी मंगळ पुढील काही महिने बलवान होऊन तुमच्या शौर्य स्थानात येणार आहे. परिस्थिती हाताबाहेर जाते असे वाटले तर ती नियंत्रणात आणताना धाडस करण्यास अनुकूल काळ आहे. कसा डाव टाकायचा आणि नियंत्रण मिळवायचे याचे कौशल्य तुमच्याकडे जन्मजात आहे. जिथे कुठे तुम्हाला बोलायची, लिहायची संधी मिळणार आहे तुमच्या फ़ायद्याची ठरणार आहे. नोकरी व्यवसायात तुम्हाला ट्रेंड सेट करण्याची संधी मिळणार आहे.

धनू रास : नोकरी व्यवसायाच्या दृष्टीने फ़ारच महत्वाचा काळ येत आहे. अनेक संधी चालून येत आहेत. तुमच्या नवकल्पना आमलात आणुन त्या यशस्वी करण्याच्या दृष्टीने पावले टाका. तुमच्या कल्पना नक्कीच लाभदायी होतील. बुडीत खात्यात टाकलेले पैसे मागण्याचा काळ आहे. आजवर ज्यांना पैसे दिले आणि त्यांनी परत दिले  नाहीत त्यांना मागा. जोडीदारा बरोबर आनंदाने अनेक गोष्टी करण्याचे योग आहेत. मग ते फ़िरायला जाणे असेल किंवा खरेदीला.

मकर रास : मकर राशीत मंगळ गेल्याने आपल्या विचार करण्यात किंवा कृतीत वेग आल्याचे आपल्या स्वत:ला जाणवेल. अनेक गोष्टी पेंडीगला पडल्या असतील त्या या काळात कार्यान्वीत होतील.   प्रॉपर्टीचे काम मागे पडले असेल तर ते आधी करा. इच्छाशक्तीचा वापर जरा वाढवूनच कामे मार्गी लागतील. मकर राशीच्या लोकांना कुणाला प्रपोज करायचे असेल तर ८ जून पर्यंत थांबा. जरा स्वत:ला आपण प्रपोज करण्यासाठी सुयोग्य बनवा. श्री विष्णु अवतार ज्यांचे आराध्य आहे त्यांना २७ मे नंतर भक्तीत रममाण होण्यासाठी अनुपम काळ आहे.

कुंभ रास : मकरेचा मंगळ बाराव्या स्थानी आल्याने खर्च वाढणार असला तरी तो प्रॉपर्टी खरेदी, दुरुस्ती यासाठी असल्याने प्रॉडक्टीव्ह असेल. कामाच्या निमीत्ताने प्रवासाचे योग येतील. प्रवास फ़ारसा सुखकर नसेल यासाठी प्लॅनिंग जोरदार करा. आजच रेल्वे तिकीट बुकिंगच्या IRCTC ने त्यांचे वॅलेट वापरात आणले आहे. तात्काळ तिकीट वॅलेट वापरुन वेगाने हातात पडल्याने कन्फ़र्म होण्याचे प्रमाण वाढेल असे म्ह्णतात. मकर राशीतला मंगळ काही विमान प्रवास देत नाही त्यामुळे तो खडतर होणार नाही हे पहा.  शेअर मार्केटवाल्यांनी कॅलक्युलेटेड रिस्क घ्यायला हरकत नाही. काही लाभ आत्ता पदरात पडले नाहीत तरी पोर्ट्फ़ोलीओ सुधारेल.

मीन रास : तुम्ही मुळचे सुखासीन वृत्तीचे आहात त्यात चतुर्थात शुक्र म्हणजे सुखाची झोप काढावी अश्या मनस्थितीत असणार. राशीचा स्वामी अनुकूल नाही म्हणुन प्रयत्न करायचा नाही का ? आपले वरिष्ठ, वडीलधारे किंवा वडील  आणि आपले कुटुंब तुम्हाला हव ते देण्यास तयार असतील. मागून तर पहा. याचा उपयोग काही प्रॉडक्टीव्ह गोष्टींसाठी करा. पुढील काही काळ भाग्य अनुकूल आहे. जरा प्रयत्न वाढवा यश मिळेल असे ग्रहमान आहे. याचा फ़ायदा आपल्या स्वप्नपुर्ती साठी करा.

शुभंभवतु



Monday, April 9, 2018

१४ एप्रिल ते १३ मे २०१८ या महिन्याचे भविष्य आणि ज्यांच्या वाढदिवस १४-१५-१६-१७ एप्रिल आहे त्यांचे अभिनंदन

पत्रिकेत एकटा एखादा ग्रह व्यक्तीचे आयुष्य बदलू शकतो का ? याचे उत्तर काही खास परिस्थितीत हो असेच देता येईल. दशमस्थान हे व्यक्तीचे कर्मस्थान म्हणुन ओळखले जाते. या ठिकाणी रवि, मंगळ, गुरु किंवा शनि सारखा बलवान ग्रह स्वराशीत, उच्च राशीत असताह्या व्यक्तींना उच्च अधिकार प्राप्त होतो. एखादा ग्रह स्वराशीत/उच्च राशीत असून स्वनवमांशात किंवा उच्च नवमांशात असेल तर अजूनहीबलवान होतो. तोच ग्रह पत्रिकेत दशमभावारंभी असेल तर ही पत्रिका अजून विशेष प्रभावी होते.

सर्व ग्रहांच्या मधे बलवान रवि आहे. तो ग्रहांचा राजा समजला जातो पण तो ३६५ दिवस बलवान नसतो. दिवसभरात तो दुपारी माध्यानसमयाला बलवान असतो तर १४-१५-१६-१७  एप्रिल या दिवशी मेष राशीत आणि मेष नवमांशात विशेष बलवान असतो. ज्यांचा जन्म या तारखांना आहे त्यातुन दुपारी १२ च्या दरम्यान आहे त्यांना नोकरी-व्यवसायात विशेष अधिकार मिळतो. त्यांची नोकरीत प्रगती वेगाने होते.

आपल्या ओळखीचे लोक शोधा ज्यांची जन्मतारीख १४-१५-१६ किंवा १७  एप्रिल आहे. आपल्याला त्यांची नोकरी/व्यवसायातली प्रगती पाहून पटेल की खरच किमान या बाबतीत हे लोक भाग्य घेऊन जन्माला आलेले आहेत. या महिन्यात त्यांचे अभिनंदन.

शनि धनु राशीत १८  एप्रिल ते ६ सप्टेंबर २०१८ काळात वक्री होणार आहे. ज्यांची रास धनु आहे, खास करुन पुर्वाषाढा नक्षत्र १ चरण आहे किंवा मुळ नक्षत्र ४ व ३ चरण आहे त्यांना मानसीक दृष्ट्या त्रास देणारा हा सर्वात कठीण काळ असेल. अर्थात शनि उपासनेने हा त्रास कमी होतो यास्तव खालील नवग्रहपीडाहर स्त्रोत्रामधला हा श्लोक दररोज २१ वेळा जपावा. शनिवारी संध्याकाळी शनि दर्शन घ्यावे.

माझे ही मुळ नक्षत्र ३ रे चरण आहे. मी ही हा त्रास पुन्हा एकदा आयुष्यात दुसर्या वेळेला अनुभवणार आहे. शनिमहाराज मला सोडणार  नाहीत. त्यांनी सदवर्तनी गुरु महाराजांना अडिच घटका त्रास दिला. मी तर सामान्य माणूस.

सूर्यपुत्रो दीर्घदेहो विशालाक्ष: शिवप्रिय:।
दीर्घचार: प्रसन्नात्मा पीडां हरतु मे शनि:।।

आता १४ एप्रिल ते १३ मे मेष महिन्याचे भविष्य पाहू. हे राशीभविष्य जसे चंद्र राशीकडुन पहावे तसे लग्नराशी कडुन सुध्दा पहावे.

मेष रास : आपल्या राशीत सध्या हर्षलचे भ्रमण असताना त्यावरुन रविचे भ्रमण ही स्थिती खासच डोक्याला त्रास देणारी असेल. डोक्यावर बर्फ़ ठेवणे हे प्रत्यक्ष करणे शक्य नसले तरी किमान १८ एप्रिल ला डोके शांत ठेवणे आवश्यक आहे. कुटुंबस्थानी १९ एप्रिलला येणारा शुक्र घरात शांतता ठेवेल. मंगळ २ मे नंतर मकर राशीत येणार आहे. त्यानंतर मात्र युध्दजन्य परिस्थितीने असेल पण तो पर्यंत डोक्यात विचार ठेवा पण डोके गरम होऊ देऊ नका. हेच तुमच्या हिताचे आहे.

वृषभ रास : राशीचा मालक शुक्र महिनाभर आपल्या राशीत असणार आहे. ही उत्तम स्थिती असली तरी फ़ारशी सुखाची नाही. असेही वृषभ राशीचे लोक कष्टाला घाबरत नाहीत. आरोग्याच्या तक्रारी, खर्च यामुळे महिनाभर आपली झोप उडणार आहे हे निश्चित. २ मे नंतर आरोग्याचा तक्रारीला आराम पडेल. नोकरी- व्यवसायाचा मालक शनि अशुभ स्थानी वक्री होणार असल्याने ही एक चिंता अजून लागून राहील असे काहीसे ग्रहमान या महिन्यात आहे.

मिथुन रास: आपल्या राशीचा स्वामी कर्म स्थानातून लाभ स्थानात ९ मे ला जाणार आहे. मागील महिनाभर जी काही कामे केली असतील त्याचे फ़ळ मिळेल अशी स्थिती ९ मे नंतर येईल. त्याच्या आधीच खर्चाची तयारी आहे कारण या महिन्यात आपण प्लेजर टुर करणार आहात. थंड हवेच्या ठिकाणी जाणार म्हणजे खर्च होणारच. पाहूया तुमच्या जोडीदाराचा राग निवळतोय का ? मागच्या किंवा या महिन्यात असे काही झाले तर ही एक संधी आहे.

कर्क रास : आपल्या संततीच्या काळजीत असाल तर २ मे नंतर यावर दिलासा मिळेल. तुमच्या दशमातून रविचे भ्रमण आहे. तुमची जन्मतारीख जर १४-१५-१६ किंवा १७ एप्रिल असेल तर प्रमोशन/अधिकारात वाढ खात्रीने दिसेल. वाढदिवस नसेल तरी इतरांना या महिन्यात नोकरीत काही विशेष अधिकार प्राप्त होतील. लाभ स्थानी महिनाभर शुक्र आहे. तो व्यापारी वर्गाला भरपूर आवक देणार आहे. सर्व आर्थिक चिंता मिटतील असे ग्रहमान आहे.

सिंह रास : तुमच्या राशीचा मालक बरेच महिन्यांनी बलवान होतो आहे. मागील काही महिने आपली गळचेपी झालेली असेल तर भरपाई होईल. एक डरकाळी मात्र अवश्य द्या. दशमात येणार शुक्र तुम्हाला सहजतेने कार्यात यश देणार आहे. या महिन्यात जर तुमचा सी आर भरला जाणार असेल तर तो चांगलाच असेल जेणेकरुन तुमचा अधिकार जेंव्हा केंव्हा प्रमोशन होईल तेंव्हा वाढेल. घरगुती फ़्रंट वर काही चिंता असतील पण तुम्ही लक्ष देऊच नका.

कन्या रास : ९ मे पर्यंत तुमचे गुण, तुमचा अभ्यास आणि तुमचे विश्लेषण याची चर्चा व्हावी असे योग आहेत. होणार नसेल तर ती तुम्ही घडवा. थोडा आत्मविश्वास दाखवा आणि बोलणार्याची माती विकली जाते हे सत्य असेल तर तुमची बुध्दीमत्ता हे तर १०० नंबरी सोने आहे. तुम्ही घोडे दामटा. त्या शिवाय यश नाही. भाग्यात जाणारा शुक्र तुम्हाला यश देणारच आहे. ९ मे पर्यंत एकही संधी सोडु नका आणि कच ही खाऊन नका.

तूळ रास : तुमच्या राशीचा स्वामी जवळ जवळ महिनाभर अशुभ स्थानी असणार आहे. ह्या स्थानी असलेला राशी स्वामी सहज यश देत नाही. कोणतेही काम आपले सहज पुर्ण होणार नाही. चांगले प्लॅनिंग करुन प्रयत्न करावे लागतील. आपला भाग्येश व व्ययेश सप्तम स्थानी जाणार आहे. याचा अर्थ आपले भाग्य व्यापारातुन, खास करुन परदेशी वस्तु, परदेशी व्यक्ती या माध्यमातून उघडण्याचे संकेत आहेत. नाराज राशीस्वामी असताना प्रत्येक सौदा नीट तपासून घ्या.

वृश्चिक रास : घरगुती कलह मिटवताना आपल्याला बराच काळ द्यावा लागेल. आपण मोजके आणि जिव्हारी लागेल असे बोलता असा लौकीक आहे. शक्य असेल तर जरा राग गिळा. तुम्हाला खास आपले वाटणारे मित्र किंवा सासुरवाडीचे लोक सध्या कुणाच्या संगतीत काय खिचडी पकवत आहेत त्याकडे फ़क्त लक्ष द्या. ९ मे नंतर हे तुमच्या विरुध्द उघड बोलणार आहेत. अश्यावेळी तुमच्या हातात नेमकी बातमी हवीच.

धनु रास : तुमच्या राशीतून होणारे मंगळाचे भ्रमण आणि त्याचा २५ एप्रिल ला होणारा प्लुटो बरोबरचा सहयोग जरा उद्वीग्नता देणारा असेल. साडेसातीच्या पार्श्वभुमीवर मंगळाचे हे पुर्वाषाढा नक्षत्रातले भ्रमण ज्यांचे नक्षत्र पुर्वाषाढा आहे त्यांना १४ ते १८ तारखांपर्यंत मातेसोबत वाद विवादातून पीडा देईल. माताच काय पण मातेसमान सर्व व्यक्तिंचे गैरसमज यातून उद्वीग्नता येईल.
आपण काय करणार. वाद टाळणे इतकेच आपल्या हातात असते. शिक्षण क्षेत्रात काही अपेक्षीत संधी आपल्यासाठी वाट पहात आहेत.

मकर रास : मंगळाच्या भ्रमणाचा त्रास मकर राशीच्या लोकांना खर्चाच्या मुळे जाणवत असेल. अजून काही दिवस म्हणजे २ मे पर्यंत तो आहे. रविचे भ्रमण चतुर्थ स्थानातुन होताना तुमची झोप हा पापग्रह उडवेल. बुध भाग्यकारक संवाद घडवेल असे असताना मनातून हे फ़ार पुर्वीच व्हायला हवे होते असे जाणवेल.  पंचमातून होणारे शुक्राचे भ्रमण मुलांच्या खास करुन मुलीच्या प्रगतीने तुम्हाला सुख देणारे असेल.

कुंभ रास : मला सातत्याने इतरांची सेवा करावी लागते अशी आपली तक्रार असते. वृषभ राशीतुन होणारे शुक्राचे भ्रमण महिनाभर सुखावणारे असेल. आपण महिला असाल तर एकतर माहेरी जाल किंवा ज्यांची सेवा तुम्हाला करावी लागते असे लोक घरात असणार नाहीत. क्वचीत असा योग येतो. या महिन्यात घरात तुमच्या मर्जीची सुख देणारी वस्तू जसे पंखा, कुलर, एअर कंडिशनर किंवा यासारखी वस्तू खरेदी करण्याचे व सुख उपभोगण्याचे स्वातंत्र्य तुम्हाला मिळणार आहे.

मीन रास : दशमातून होणारे मंगळाचे भ्रमण आपल्याला २ मे पर्यंत दमविणार आहे. शारिरीक आणि मानसीक श्रम तुम्हाला एका मर्यादेपर्यंतच मानवतात पण हा परिक्षेचा काळ या महिन्यात संपुन त्यापासून काही चांगल्या गोष्टी, नविन संधी मात्र निर्माण होताना दिसतील. उत्पन्नाचे स्त्रोत ही वाढतील. काही अनुभव लेखन घडावे असे वाटत असेल तर चांगली संधी आहे. या कष्टातुन निर्माण झालेल्या श्रमावर एक चांगला उपाय असेल.

ज्योतिष शिकायचे आहे तर आधी पंचांग शिकायला हवे.

http://gmjyotish.blogspot.in/p/blog-page.html   पंचांग शिकूया - भाग १
http://gmjyotish.blogspot.in/p/blog-page_24.html   पंचांग शिकूया - भाग २

आपला आग्रह असेल तर ढोबळ कुंडली कशी मांडायची, स्पष्ट ग्रह, दशा अंतर्दशा या बाबत लिखाण मला करायला नक्की आवडेल.




Friday, March 9, 2018

१४ मार्च ते १३ एप्रिल २०१८ या महिन्याचे राशीभविष्य आणि विवाह लवकर व्हावा या साठीचा उपाय

आपल्या कन्येचा विवाह वेळेवर व्हावा ही कोणत्या पालकांची अपेक्षा नसणार ? प्रत्येक पालक ह्या साठी प्रयत्न करत असतात. या प्रयत्नांना दैवी उपायांची जोड मिळाली तर विवाहाच्या संदर्भात मुलींच्या पत्रिकेत खुप कठीण योग नसतील तर विवाह त्वरीत जुळुन येतात असा माझा अनुभव आहे.

चैत्रातले नवरात्र आणि अश्विन महिन्यातले नवरात्र असताना विशीष्ठ दिवशी कात्यायनी देवीची उपासना केली असता असा विवाह योग जुळून येतो असा माझा अनुभव आहे. मार्च महिन्यात २२ तारखेला संध्याकाळी असा योग येत आहे. ही पुजा कशी करावी याचा  विधी खालील लिंक क्लिक केली असता मिळेल.

http://gmjyotish.blogspot.in/2016/09/blog-post_22.html

हा उपाय करावा तसेच विवाह जमल्यावर किंवा झाल्यावर अनुभव कळवावा.

आता १४ मार्च २०१८  ते १३ एप्रिल २०१८ कालावधीसाठी राशीभविष्य पाहू. हे भविष्य चंद्र राशी तसेच लग्न राशीकडून सुध्दा वाचावे.


मेष रास : राशीचा स्वामी महिनाभर धनु राशीत तुमच्या भाग्य स्थानी आहे ही जमेची बाजू असली तरी शनि या शत्रु ग्रहाशी त्याची गाठ १-२-३ एप्रिलला पडणार आहे. या तारखांना नोकरी /व्यवसायात संघर्ष अपेक्षीत आहे. तुमचे वरिष्ठ तुमच्या विरोधात जातील. याबाबत जागरुक रहा. ज्यांच्या पत्रिकेत धनु राशीत अशी युती आहे त्यांनी वहाने जपून चालवा. २ एप्रिलच्या आधी व नंतर २-४ दिवस जोखीम पत्करु नका.
असेही ग्रहमान महिनाभर फ़ारसे तुमच्या मर्जीप्रमाणे नाही. खर्च होणार आहे. मग तो प्रवास किंवा आजारपणे यामुळे असेल. तुमचा स्वभाव नाही पण प्रत्येक कृती विचारपुर्वक करायची आहे इतके महिनाभर लक्षात ठेवा.

वृषभ रास : १४ मार्च ते २७ मार्च खिसे उघडे ठेवा. व्यावसायीक असाल तर अनेक लाभ चालत येणार आहेत. फ़क्त शेअर्स च्या बाबतीत २३ मार्च नंतर विचार करुन कृती करा. अचानक मार्केट खाली येणे अश्या घटना घडून नुकसान होऊ शकते. २७ मार्च नंतर मात्र व्यवहारांच्या बाबतीत जास्त काळजी घ्या. तरुणांच्या वागण्याकडे पालकांनी २८ मार्च ते १ एप्रिल या काळात लक्ष द्या.  राशीचा स्वामी व्ययात जात असल्याने काही संकटे येणार नाहीत याबाबत २८ मार्च ते १ एप्रील जागरुक रहा.

मिथुन रास : हा काळ प्रेमात पडलेल्या तरुणासाठी फ़ारसा चांगला नाही. गैरसमजातून ब्रेक अप होऊ नये यासाठी तसेच सर्वसामान्य राशीच्या लोकांसाठी आजारपणे, अपघात या पासून बचाव व्हावा यासाठी खबरदारी घेण्याचा काळ खास करुन २८ मार्च ते १ एप्रिल  आहे. आपल्या राशीचा स्वामी बुध २३ मार्च पासून वक्री होत असल्याने आपल्याला आपले शब्द जपून वापरावे लागतील किंवा शब्द आठवणार नाहीत असाही त्रास जाणवेल. खास मिटींग मधे गाफ़ील राहू नका. तयारी करुन जा.

कर्क रास : कर्क राशीच्या स्त्रीया आपल्या मुलांच्या बाबतीत २८ मार्च ते १ एप्रिल  या काळात जागरुक रहा. ही शनि- मंगळाची युती जरा त्रास दायक असते. इतके सोडले तर बाकीच्या फ़्रंटवर या महिन्यात फ़ार चिंता करावे असे ग्रहमान नाही. मागील पानावरुन पुढे असे ग्रहमान आहे.

सिंह रास : राशीचा स्वामी महिनाभर अशुभ स्थानी असल्याने प्रतिकार शक्ती कमी होऊन काही आजारपण नियमीत पणे दरवर्षी या महिन्यात येत असेल तर त्याबाबत काळजी घ्या. तुमची पत तुमची प्रतिष्ठा या महिन्यात पणाला लागेल असे ग्रहमान राशीचा स्वामी रवि महिनाभर अशुभ स्थानी असल्यामुळे आहे. घरच्या आघाडीवर सुध्दा फ़ारसे चांगले ग्रहमान नाही. घरात सुध्दा तुमचा शब्द ऐकला जाईल असे वाटत नाही. त्यापेक्षा वादात न पडता सिंह जसा अलिप्त असतो तसे रहा हा सल्ला. पुढील महिना तुमचा आहे. प्रॉपर्टी संदर्भात एखादा खटला निकालाच्या दरवाज्यात असेल तर आपले वकील तो जिंकतील याबाबत खात्री करुन घ्या.

कन्या रास : तुमचे आराखडे या महिन्यात २३ मार्च नंतर चुकू शकतात. व्यापारी अंदाज चुकून किंवा तुम्ही केलेली कागदपत्रे चुकून नुकसान होणार नाही ना याची काळजी २३ मार्च ते पुढे १५ एप्रील पर्यंत घ्या. शेअर बाजारातले निर्णय या काळात जास्त काळजी पुर्वक घ्या. प्रिंटिंग/प्रकाशन/कमीशन एजंट व्यवसायात सुध्दा खबरदारी हवी आहे. व्यापारात येणारे नविन प्रपोजल्स २७ मार्च पुर्वी मार्गी लावा. घरात भांड्याला भांडे लागू शकते यासाठी २८ मार्च ते १ एप्रिल  या काळात डोक्यावर बर्फ़, तोंडात साखर धरुन ठेवा.

तुळ रास : तुला राशीचा स्वामी २७ मार्च पर्यंत सहाव्या स्थानी आहे. आपल्या त्रिकोणातल्या राशीत शुक्र आला आहे. आपल्याला कर्ज हवे असल्यास पटकन मिळुन जाईल. वसूली करायची असल्यास एक नोटीस धाडा आणि पहा काय गंमत होते. चेक बाउंन्स झाला असल्यास या महिन्यात पोलीस कारवाई करुन आपल्या देणेकर्यांना जरा वठणीवर आणा. तुमच बॅलन्स करणे सोडा आणि जरा कडक व्हा. पैसे बिनव्याजी वापरण हा स्वभाव आहे त्यांना जरा दणका द्याच. २७ तारखेनंतर घरच्या फ़्रंटवर काय काय घडते आहे ते तुम्ही कुणाला सांगू नका. फ़ारच रोमॅंटीक काळ असेल.

वृश्चिक रास : आग है लगी हुवी हर तरफ़ यहा वहा हे गाणे आठवा. आग लागलीच तर अग्नीशमन करण्यासाठी काय काय करावे लागेल याचा अंदाज घ्या. नोकरी व्यवसायात आग लागली तर ते साहजीक आहे. पण घरच्या फ़्रंट्वर आग लागणे जरा त्रासदायक. तोंड येणे, गरम चहा/सुप पिल्याने तोंड भाजणे, पानातला चुना लागणे यासारख्या घटना होतील. तोंडाचा अल्सर होणार्यांनी थंडावा देणारी मलमे शोधून ठेवा. २७ मार्च पर्यंत शिमगा संपला तरी तुमचे कवित्व संपणार नाही. आपल्या प्रतिस्पर्ध्याला जळवण्यासाठी हुकमी प्रतिक्रिया द्याल. लोन हवे असेल तर २७ तारखेनंतर प्रयत्न करा.

धनु रास:  आग घरात लागली तर ठीक विझवता येईल पण मस्तकात लागली तर काय करणार ? आपले व्यक्तीमत्व मुळात अंगार त्यात मंगळाचा आपल्या राशीत प्रवेश आहे. डोक्यावर बर्फ़ धरा नाहीतर जवळचे सुध्दा जळून खाक होतील असे या महिनाभरात अनेकदा घडेल. तुमचा राग सात्विक असतो. तुमचे रागावणे व्यक्तींवर नसून स्वभावावर किंवा चुकीच्या गोष्टींवर असते हे जवळच्यांना समजले तर ठीक नाहीतर त्रास तुम्हालाच. १८ मार्चला पाडव्याच्या मुहूर्तावर घरात एखादी नविन वस्तू येईल. ती आल्यावर भौतीक सुखाचा अनुभव एखाद्या थंड हवेच्या झुळकीसारखा असेल.

मकर रास : शनि आणि मंगळ जर सर्वात जास्त हानी कोणाला देणार असतील तर तुम्हाला. साडेसाती सुरु आहे. शनि तुमच्या राशीचे स्वामी असले तरी त्यांनी गुरु ला सोडले नाही तर तुम्हाला काय ते सोडणार ? आलेला पैसा घरी न येता त्याला वाटा फ़ुटतील. ती गुंतवणुक नसेल तर विनाकारण झालेला खर्च असेल. तुमची साधी रहाणी आणि उच्च विचारसरणी असते पण मित्रांनी तुम्हाला खड्यात घालायचे ठरवलेच असेल तर खोट्या प्रतिष्ठेसाठी काही पैसे खर्च कराल. कशी भुल पडली असा प्रश्न स्वत:ला नंतर विचाराल.

कुंभ रास : शनि देत आहे अजून देणार आहे. काही अपघाताने आपला फ़ायदा होणार आहे ? हजारो लोक लॉटरीवर पैसे लावतात आणि तुम्ही चक्क जिंकता असे ग्रहमान शनि मंगळाच्या योगाने येत आहे. शनि-मंगळाच्या युतीचा तुमच्या वैयक्तीक जीवनावर वाईट प्रभाव न पडता लाभ होणार आहे. असे ग्रहमान क्वचितच असते. तुमचा कुंभ भरुन वहाणार आहे त्याचे प्लॅनिंग करा. २७ मार्च २०१८ पर्यंत शिल्लक वाढली तर गुंतवणुक करा. शेअर मार्केटमधे नको. सध्या तरी PPF/FD चा विचार करा. एकदा शेअर मार्केट स्थिरावले की मग विचार करा.

मीन रास : मीन राशीचे लोक जरा थंड असतात. पण पुढील महिना तुमची पळापळ होणार आहे. अचानक कामे वाढतील. तुम्हाला अनेक फ़्रंटवर लढाई करावी लागणार आहे. तुमच्या राशीचा मालक वक्री असल्याने या लढाईचे काय होणार ? यश हव असेल तर इच्छा शक्तीचा प्रचंड दबाव तयार करावा लागेल. हीच संधी आहे स्वत:ला सिध्द करण्याची. इथे मागे पडलात तर खुप काळ लागेल तुमची पत वाढायला. तुमच्या राशीच्या स्वामीची प्रार्थना करा आणि लढायला तयार व्हा.


Thursday, February 8, 2018

१२ फ़ेबृवारी २०१८ ते १४ मार्च २०१८ ह्या काळाचे राशीभविष्य तसेच महाशिवरात्रीला काय करावे याची माहिती.

आपणा सर्वांना आत्तापर्यंत मी रवि ज्या महिन्यात ज्या राशीत असतो तो महिना गृहीत धरुन राशीभविष्य प्रसिध्द करतो. या महिन्यात १२ फ़ेबृवारी २०१८ ते १४ मार्च २०१८ ह्या काळात रवि कुंभ राशीत आहे. कुंभ राशीत रविला बलहीन असतो. या काळात अनेकांना विवीध रोगांना सामोरे जावे लागते. यास्तव या महिन्यात खाणे-पिणे याचे विशेष लक्ष देऊन करणे आवश्यक ठरते. प्रत्येकाच्या पत्रिकेत असलेला रवि हा रोगप्रतिकारक शक्तीचा कारक बलहीन असल्याने हे सांगणे आवश्यक वाटते.

या महिन्यात दोन महत्वाची पर्वे येतात. १३ फ़ेब्रुवारीला महाशिवरात्र आहे. या दिवशी शिवआराधन केल्याने नातेसंबंधात असलेले प्रश्न कमी होतात किंवा सुटतात. शक्य असेल तर उपवास करावा. उपवासाचा आग्रह नाही. परंतु शंकराला आधी पाणी मग थोडेसे दुध पुन्हा पाणी याचा अभिषेक करावा. घरात पिंडी असेल तर घरी करावा. मंदीरात गर्दी असल्याने हे शक्य नसेल तर घरी करावे.  हे करताना तांबे धातूचे  ताम्हण घेऊ नये. स्टीलचे चालेल किंवा चांदीचे असल्यास उत्तम. कारण तांबे आणि दुध याचा संपर्क आल्यास ते जल/दुध तिर्थ म्हणुन प्राशन केल्यास रोग उद्भवतील. यानंतर १०८ बेलाची पाने वाहून प्रत्येक पान वहाताना ओम नमशिवाय हा जप करावा. नाते संबंध सुधारावेत अशी प्रार्थना शिवाकडे करावी. त्यानंतर आरती करावी. दुधमिश्रीत पाणी तिर्थ घ्यावे. शंकराला नैवैद्य म्हणुन जे ठेवाल ते प्रसाद म्हणुन घ्यावे. महाशिवरात्रीच्या दिवशी हे संध्याकाळी प्रदोष पुजनाने शिवाअराधन करुन नातेसंबंध पुन्हा पुर्ववत होतात असा अनुभव आहे.

२६ फ़ेब्रुवारीला येणारी आमलकी एकादशीचे दिवशी आवळा वृक्षाच्या सहवासात असणे. आवळा श्री विष्णूंची पुजा करुन अर्पण करणे. प्रसाद रुपी आवळ्याचे सेवन करण्यासाठी उत्तम दिवस आहे. आवळा ७२ रोगांवर औषध आहे. आयुष्याची वाढ करणारा आहे.

या शिवाय होळी व रंगपंचमी हे पारंपारीक सण आल्याने हा महिना आनंदाचा आहे.

हे राशीभविष्य आपण लग्नराशीकडून सुध्दा वाचा हे सांगणे आहेच शिवाय ही लिंक कॉपी पेस्ट करुन पुढे पाठवली तर मला आनंदच वाटेल.

आता राशीवार भविष्य पाहू

मेष रास : आपल्या राशीचा स्वामी मंगळ ७ मार्च पर्यंत अशुभ स्थानी असल्यामुळे आपल्या आक्रमक स्वभावाला अपेक्षीत यश नाही तुर्तास धाडस करु नका अंगाशी येईल. १४ फ़ेबृवारी ते २ मार्च पर्यंत लाभस्थानी बुध रवी आणि शुक्र असल्याने अनेक मार्गाने आपल्याला लाभ अपेक्षीत आहेत मग विनाकारण धाडस कशाला करता ?

आपले नातेसंबंध उत्तम असतील. नोकरी व्यवसायात आपल्याला रिपोर्ट करणारे रिपोर्टी आपल्याला लाभदायक गोष्टी करतील. तुमच्या वरिष्ठांची चिंता अजून सहा महिने करुच नका. आपला जोडीदारही आनंदात असेल.  आपल्या संततीलाही नेत्रदिपक यश मिळेल असा हा महिना आपल्यासाठी लाभदायक आहे.

वृषभ रास: जोवर शनि अष्टमात आहे तोवर सहजा सहजी काहीच घडणार नाही पण तुम्हाला याची चिंता असणार नाही. चिकाटी आणि साखर पेरणी हा आपला गुण जोवर आपणापाशी आहे तोवर ग्रहमान कसेही असू द्या. सहसा या महिन्यात कोणाची ऑफ़िशीयल प्रमोशन्स होत नाहीत पण आपल्याला स्पेशल अधिकार या महिन्यात मिळतील आणि ते पुढे प्रमोशनने तुमच्या पाशी कायम रहातील असे योग आहेत.

नोकरी व्यवसायाच्या पटलावर अनेक गोष्टी घडुन मनासारखे व्हावे असे योग आहेत. नातेसंबंधापैकी चिंता फ़क्त जोडीदाराच्या आरोग्याबाबत  ७ मार्च नंतर करावी लागेल. हारी हुवी बाजी को जितना मुझे आता है हे गाणे प्रत्येक वेळेला मनासारखे झाल्यावर तुम्ही मनातल्या मनात का होईना तुम्ही म्हणणार आहात.

मिथुन रास: तुमच्या राशीचा स्वामी बुध महिन्याच्या सुरवातीला भाग्य स्थानी तर नंतर २ मार्च ला कर्म स्थानी जाऊन बसणार आहे. बर भाग्यात असलेला बुध कुंभ राशीत असल्याने तुमची असली ताकद बुध्दीमता वापरुन केलेली प्रत्येक कृती तुम्हाला संधी निर्माण करुन देणार आहे पुढे यश ही देणार आहे. तुमचे व्यावसायीक अंदाज/अ‍ॅनालिसीस बरोबर येईल.

कौटुंबीक स्तरावर संतती कला क्षेत्रात नविन संधी घेताना दिसेल. भावंडे सुध्दा आपपल्या क्षेत्रात नाव कमवताना दिसतील. तुमचे रिपोर्टी काय करु शकतील याचा अंदाज तेव्हडा घ्या. वरिष्ठांची चिंता करु नका. एकंदरीत चांगले ग्रहमान या महिन्यात आहे.

कर्क रास : हा महिना काही तुमच्या साठी बनविलेला नाही अशी खुण गाठ बांधून मगच कामाला सुरवात करा. आपल्याला अपयश मिळेल का तर तसे नाही. पण मनासारखे घडावे असे ग्रहमान नाही इतकेच नमूद करायचे आहे.

कौटुंबीक स्तरावर काळजी करावी या पेक्षा त्यांच्या कडे लक्ष द्यावे लागेल असे ग्रहमान आहे. नोकरी व्यवसायाच्या ठिकाणी जरा बरे ग्रहमान महिनाभर असेल. ३ मार्च नंतर परिस्थितीत जरा बदल घडेल हे ही नसे थोडके.

सिंह रास : तुमच्या राशीचा स्वामी पुढील महिनाभर सप्तम स्थानी असणार आहे. हे स्थान म्हणजे बाजार आहे. तुम्ही कलाकार असाल तर तुम्हाला कला पेश करायला उत्तम संधी महिनाभर असली तरी पैसा वसूल परफ़ॉर्मन्स द्यायला हवा आहे. Conviction चा पैसा आहे अस  संजय जाधव वारंवार म्हणतात याचा अनुभव तुम्हाला येईल.

कौटुंबीक स्तरावर ठिक असेल. नोकरीच्या ठिकाणी आगाऊ रिपोर्टीचे कान ओढून लंबे करण्याची वेळ आली आहे. हे करताना नियमाचा आधार घेतल्याशिवाय काही करायचे नाही असा नियम ठेवा. पुढच्या महिन्यात साहेबांच्या कानाला लागण्याची भिती वाटावी असे कान ओढा म्हणजे सगळे  व्यवस्थित होईल.

कन्या रास: या महिन्यात तुमच्या महिन्याचा स्वामी सहाव्या स्थानी २ मार्च पर्यंत असेल. आरोग्य संभाळावे लागेल पण त्याचे बरोबर झालेले नुकसान भरुन काढण्याच्या संधी सुध्दा वाट पहात आहेत. धक्का मारल्या शिवाय काहिही पदरात पडणार नाही असे एकंदरीत वातावरण महिनाभर आहे.

कौटुंबीक स्तरावर सर्व काही ठीक असेल. नोकरी व्यवसायाच्या ठिकाणी वरिष्ठांशी संघर्ष करावा लागेल पण २ मार्च नंतर ही स्थिती कायम रहाणार नाही असे एकंदरीत वातावरण आहे.

तूळ रास : आपल्या राशीचा स्वामी ३ मार्च पर्यंत पंचम स्थानी म्हणजे नवनिर्मीतीच्या कामात व्यस्त असणार आहे. तुमचा भाग्येश तुम्हाला या कामी मदत करणार आहे. फ़क्त डोळे मिटा अनेक नविन गोष्टी तुमच्या बंद डोळ्यांच्या समोर दिसू लागतील. जे कलाकार आहेत त्यांना नविन सुचेल. एक डायरी जवळ ठेवा. जे सुचेल ते लिहीत जा.  ज्यातून नविन कलाप्रदर्शनाची संधी पुढे चालून येईल.

कौटुंबीक स्तरावर कटकटी असणार आहेत. पण तुमच्याकडे ते बॅलन्स करायाचे कौशल्य असल्यामुळे फ़ारसे बिघडणार नाही.

वृश्चिक रास: तुमच्या राशीचा स्वामी या महिन्यात वृश्चिक राशीत असणार आहे. मंगळाची ही दुसरी रास आक्रमक पणे जे साध्य होत नाही ते कुटीलपणे मिळवण्यात आग्रही असते. ज्यांना याचा डंख बसतो ते दु:खी होतात. काय करणार आपले हे हत्यार आहे. आपला राशी स्वामी योध्दा आहे. सतत प्रयत्नशील असणे त्याचा स्वभाव आहे.

७ मार्च पर्यंत जरा आराम करा. आपले विचार सोडून  जाणिव करुन घ्या की गादीचा कापूस असो ही फ़ोम किती मऊ असतो. या सुखमंचकी आनंद घ्या. नंतर आपली कारवाई सुरू करा. कौटुंबिक स्तरावर हाच अनुभव तुम्हाला येणार आहे. नोकरी व्यवसायात आपली स्थिती चांगली असेल. मग कशाची चिंता आहे?

धनू रास: आपल्या राशीचा मोठा त्रासदायक काळ सुरु आहे. त्यातून मूळ नक्षत्राच्या लोकांना खासच त्रास आहे. साडेसाती अगदी त्रासदायक होण्याचा काळ म्हणतात तो हाच कारण सध्या शनि मूळ नक्षत्रात आहे. तरी सुध्दा न कंटाळता शनिवारी शनिदर्शन आणि दररोज नवग्रह पीडाहर स्त्रोत्रातला खालील मंत्र म्हणला की त्रास कमी होईल.

सुर्यपुत्रो दिर्घदेहो विशालाक्ष शिवप्रिय: ।
मंदाचार प्रसन्नात्मा पीडा हरतु मे शनि ॥

शनिला ही प्रार्थना समजते आणि शनि महाराज पीडा हरण करतात असा अनुभव आहे.  इतर राशींना जर साडेसातीचा त्रास होत असेल तरी उपाय हाच आहे.

मकर रास:  आपला राशी स्वामी खर्चाच्या, मनस्तापाच्या आणि पीडेच्या स्थानी आहे. आपले धैर्य आणि चिकाटी हे गुण शनिचे असल्यामुळे तुम्ही खचून न जाता मार्गक्रमण करता. असे असले तरी हा महिना आपल्यासाठी रोख रक्कम घेऊन येणार आहे. कुठे गुंतवू हा प्रश्न तुमच्या मनी असेल. योग्य ठिकाणी गुंतवणूक करा. फ़ार रिस्क घेऊ नका असा सल्ला आहे. हा निर्णय लवकरात लवकर म्हनजे २ ते ३ मार्च च्या आत घ्यावा लागणार आहे.

कौटुंबीक स्तरावर हा महिना चांगला असेल. अनेक नातेवाईकांचे घरी आगमन होईल. त्यांच्या बरोबर सहभोजन होईल. या महिन्यात काही रिपोर्टी आणि तुमचे वरिष्ठ सुध्दा घरी आल्यास आश्चर्य वाटु नये असे ग्रहमान आहे. पाहूणचार करताना काय बोलायचे याचे भान ठेवा म्हणजे हवे ते घडेलच.

कुंभ रास: महिनाभर दशमस्थानी असलेला मंगळ नोकरी व्यवसायाच्या ठिकाणी संघर्ष/ पळापळ देणार आहे. अचानक काही घडेल त्याला तोंड द्यावे लागेल याची तयारी ठेवा. ७ मार्च नंतर ही परिस्थिती नियंत्रणात येईल.

कौटुंबीक स्तरावर ग्रहमान ठीक आहे. नोकरी व्यवसायात सर्वांचे सहकार्य मिळून वर लिहल्याप्रमाणे संघर्षात्मक परिस्थितीवर आपण यश मिळवणारच आहात. एकंदरीत असे ग्रहमान महिनाभर आहे.

मीन रास: ३ मार्च पर्यत ग्रहस्थिती तुमच्या नियंत्रणात नाही. प्रवास, आजारपण, खर्च याने नुसते वैतागुन जाल असे ग्रहमान ३ मार्च पर्यंत असणार आहे. त्यानंतर मात्र हळू हळू परिस्थिती तुमच्या नियंत्रणात येईल.

कौटुंबीक स्तरावर जोडीदार आजारी पडणे किंवा सासुरवाडीच्या लोकांचे आरोग्य बिघडणे याच बरोबर घरातले नोकर किंवा तुम्ही ज्यांच्यावर नोकरी व्यवसायात अवलंबुन आहात असे लोक आजारी पडणे किंवा त्यांच्या घरचे लोक आजारी झाल्याने ते कामावर न येणे आणि वरिष्ठ मात्र कामाचा तगादा करणे या कचाट्यात तुम्ही सापडणार आहात. असे झाले तर काय करायचे याचे प्लॅनिंग  केलेले असेल तर कुठलेही संकट सहजपणे परतावता येते हा मंत्र ध्यानात ठेवावा.