Wednesday, November 14, 2018

१६ नोव्हेंबर २०१८ ते १५ डिसेंबर २९१८ या कालावधीचे राशीभविष्य आणि कार्तिक स्वामी दर्शन.

नमस्कार ज्योतिषप्रेमी लोकहो. घेऊन आलो आहे १६ नोव्हेंबर २०१८ ते १५ डिसेंबर २९१८ या कालावधीचे राशीभविष्य आणि कार्तिक स्वामी दर्शन.



या महिन्यात येणारी पोर्णिमा कार्तिकस्वामी दर्शनासाठी उत्तम दिवस समजला जातो. कार्तिकस्वामी ह्या देवतेचे दर्शन आवर्जून दररोज घेण्याचा प्रघात महाराष्ट्र आणि त्यावरील राज्यात नाही. महाराष्ट्रात कार्तिकस्वामींचे दर्शन कार्तिक पोर्णिमेला घेतले जाते. संपुर्ण दिवस हा ह्या दर्शनासाठी योग्य मानला जात नाही तर पोर्णिमेच्या दिवशी जेंव्हा कृतिका नक्षत्र असते तो कालावधी कार्तिकस्वामींच्या दर्शनासाठी उत्तम मानला जातो. कार्तिकस्वामी अर्थात कार्तिकेय म्हणजेच पुराणात ज्यांना शंकर पार्वतीचा जेष्ठ पुत्र व गणपतीचा मोठा भाऊ ह्या देवतेच्या दर्शनाने वर्षभर आर्थीक संकटे सतावत नाहीत असा हा उपाय आहे. यामुळे जे कर्जबाजारी आहेत. कर्जाने त्रासले आहेत किंवा ज्यांना अर्थिक व्यवस्थापन निटसे जमत नाही त्यांनी आवर्जून कार्तिक स्वामींचे दर्शन २२ नोव्हेंबर २०१८ रोजी सायंकाळी ५ वाजून ५० मिनीटानंतर घ्यावे. कार्तिक स्वामींचे दर्श २३ नोव्हेंबर सकाळी ११ वाजेपर्यंत आपण घ्यावे. ही पुजा कशी करावे याचे वर्णन दातेपंचाग शके १९४० मधे पान २५ वर आहे. मंत्र पठणाने विधीवत केलेली पुजा जास्त लाभदायक असते.

 कार्तिकस्वामींना मोरपीस अर्पण करण्याची पध्दत आहे. या साठी २२ तारखेपर्यंत वाट न पहाता जेंव्हा मिळेल तेंव्हा ते घेऊन ठेवावे कारण त्या दिवशी मोरपीसाला सुध्दा खुप पैसे मोजावे लागतात.
आपण जवळच्या कार्तिक स्वामींच्या मंदीरात जाऊन पुजा करावी. जिथे मंदीर नाही अश्यांनी वरील प्रतिमा व्यवस्थित स्थापन करून पुजन करावे. अगदीच शक्य झाले नाही तर स्मरण करावे.


वरील पॅरेग्राफ़ वाचल्यावर अनेक लोक असे म्हणतील की वर्षभरात एकदा दर्शन घेऊन काही काम धंदा न करता पैसे कसे येतील. मलाही तेच म्हणायचे आहे. काम धंदा /नोकरी तर करायलाच पाहीजे. परंतु या दिवशी कार्तिक स्वामींची पुजा केल्यानंतर अजून पैसे कोणत्या मार्गाने सहज, बुध्दीचा किंवा कष्टाचा किंवा दोन्हींचा वापर करुन मिळवावेत याचा मार्ग सापडू शकतो. कोणतिही पोर्णिमा शुभ असते. शुभ असते याचा अर्थ त्या दिवशी मानसीक स्थिती उत्तम असते. या दिवशी पुजा झाल्यावर सहज मन एकाग्र होऊ शकते व चिंतनातून अर्थप्राप्तीचा एखादा नविन मार्ग सापडू शकतो किंवा आपण करणार आहात ती गुंतवणूक चुकीची तर नाही याचे ज्ञान झाल्याने आपण आर्थीक संकटात पडणार असाल तर त्यापासून मुक्तता मिळू शकेल.

आता पाहू या १६ नोव्हेंबर २०१८ ते १५ डिसेंबर या वृश्चिक राशीत रवि महिनाभर असलेल्या महिन्याची इतर ग्रहांची स्थिती आणि या महिन्याचे राशीभविष्य



१६ नोव्हेंबर २०१८ ते १५ डिसेंबर २०१८ काळाची चंद्र सोडून ग्रहस्थिती पाहीली असता जो तो ग्रह आहे त्याच राशीत या काळात रहातो.

या महिन्याच्या सुरवातीला   गेले दीड महिना वक्री असलेला शुक्र मार्गी् होणार असून तो स्वत:च्या तूळ राशीत राहून उत्तम फ़ळे देणार आहे. बुध या महिन्याच्या सुरवातीलाच १७ नोव्हेंबरला वक्री होणार असून तो ७ डिसेंबरला मार्गी होईल. याचे शेअर बाजारात दिसती.
गुरु सुध्दा १५ नोव्हेंबर ते ६ डिसेंबर या काळात अस्तंगत असल्यामुळे याचे ही परिणाम म्हणून विवाह विषयक बोलणी पुढे जाणार नाहीत. कर्जे किंवा आर्थिक व्यवहार वेगाने चालणार नाहीत असे दिसतील.

राशीवार भविष्य पहाताना हे आपण लग्नराशी किंवा चंद्र राशी किंवा दोन्ही राशीकडून वाचून अनूभव घेऊ शकाल.

आता राशीवार भविष्य पाहू

मेष रास: मेष राशीचा मालक मंगळ महिनाभर कुंभ या शनिच्या राशीत लाभ स्थानी असल्यामुळे महिनाभर जे अपेक्षीत असेल ते प्रयत्न केल्याने मिळेल. याला अपवाद फ़क्त ६ डिसंबर ते १० डिसेंबर या काळाचा आहे. या काळात आपण संभ्रमात पडाल त्यामुळे नेमके काय हवे त्याकडे फ़ोकस न करता आल्यामुळे काही भलतेच स्विकारून बसल्याने घोळ होऊ शकेल. यासाठी ज्या कामांचा महिनाभर पाठपुरावा करुन मार्गी लावायची आहेत त्या संदर्भात ६ ते १० डिसेंबर २०१८ या काळात निर्णय घेताना सावधानता बाळगा.

ज्यांचा संबंध फ़ोटॊग्राफ़ी, सिनेमा, एक्स रे याच्याशी आहे अश्यांना ४ डिसेंबर नंतर मोठ्या व्यावसायीक संधी येतील. ज्यांचा व्यवसाय ह्या क्षेत्रात नाही त्यांनी मात्र ४ डिसेंबर नंतर येणार्या व्यावसायीक संधी पारखून घ्याव्यात. वैवाहीक जोडीदार व एकंदरीत कौटुंबीक स्तरावर वातावरण आनंददायी असेल.

ज्यांना दमा, फ़ुफ़्फ़ूसे, सर्दी, पचन यासंदर्भात त्रास आहेत ते जास्त वाढणार नाहीत यासाठी त्रास होताच आपल्या डॉक्टरची भेट घेऊन औषधे घ्यावीत.थोडक्यात आरोग्याच्या बाबतीत चालढकल न करता काळजी घ्यावी.

वृषभ रास : ग्रहस्थिती उत्तम आहे असे नाही. आरोग्य बिघडणार नाही याची काळजी घ्यावी. मद्य प्राशन करणार्यांनी विशेष सावधानता बाळगावी. एकतर आरोग्य बिघडेल आणि नशेत खिसा ही मारला जाईल अशी शक्यता नाकारता येत नाही. जे शेअर बाजारात रिस्क घेतात त्यांनी व्यवहार करताना अनेक वेळा तपासून पहावेत.

एका बाजूला नोकरी/व्यवसायात कामाचे प्रेशर आणि दुसर्या बाजूला आरोग्याच्या तक्रारी यामुळे हैराण होऊ नये असे वाटत असेल तर महिन्याच्या सुरवातीला ज्यांना आरोग्याचे कायमचे त्रास जसे डायबेटीस किंवा अन्य काही असल्यास त्याची तपासणी करुन आपल्या डॉक्टरांचा सल्ला घेऊन नियमीत औषधे घ्यावीत.

याच महिन्यात बुध वक्री होणार आहे जो तुमच्या कुटुंबास्थानाचा आणि संततीच्या स्थानाचा मालक आहे. या दोन्ही स्तरावर १७ नोव्हेंबर ते ७ डिसेंबर २०१८ हा काळ काही उत्तम असेल असे वाटत नाही. तुमच्या कुटुंबाची किंवा संततीसंदर्भात एखादी चिंता सतावेल.

मिथुन रास: आपल्याही राशीचा स्वामी बुध हा जवळ जवळ तीन आठवडे वक्री असणार आहे व तो सहाव्या स्थानी वक्री होणार आहे. हा बुध आपल्या वाणीने अकारण शत्रुत्व निर्माण करेल यास्तव जाता जाता मस्करी करायची, शाब्दीक कोटी करायची यावर नियंत्रण ठेवा. लग्नेश सहाव्या स्थानी वक्री झाला म्हणजे प्रतिकार शक्ती कमी असेल. प्रतिकार शक्ती देणारा दुसरा ग्रह रवि सुध्दा याच स्थानी असल्याने साथीचे रोग सहजपणे शिरकाव करु शकतील यास्तव महिनाभर अरोग्याच्या नियमांचे पालन करणे अत्यावश्यक असेल. मिथुन लग्न रास असलेल्या लोकांना याचा अनुभव येऊ शकेल.

पंचमात शुक्र तो ही तुळेचा आपल्याला विशेष फ़ळ देऊन जाईल. ज्यांचा कला क्षेत्रात संबंध आहे ते काही कलाकृती निर्माण करतील. विद्यार्थी वर्गाला खास करुन कला क्षेत्रातील लोकांना परिक्षा मधे यश नक्कीच मिळेल.  तरुणांना ह्र्दयात वाजे समथिंग ह्या ओळीचा अनुभव नक्कीच येईल.

भाग्यातला लाभे्श आणि सहाव्या स्थानाचा मालक मंगळ आपले आजवर लिटीगेशन मधले प्रॉपर्टी मॅटर्स वर हालचाल होऊन एक टप्पा पुढे जाताना दिसतील. पण अजून पुर्ण निकाल लागायला वेळ लागेल असे अनुमान आहे.

कर्क रास: आपली संतती आपल्यासाठी फ़ारच गंभीर विषय असतो. ६ ते १० डिसेंबर या काळात संतती साठी काही वेळ द्यावा लागेल. एखादे छोटेसे आजारपण असेल किंवा काही काळजीचा विषय निर्माण झाल्यामुळे आपल्याला त्याकडे लक्ष वळवावे लागेल.

हा काळ सोडला तर तुळेचा शुक्र चतुर्थात आल्याने "सुख म्हणजे काय असत " ह्या प्रशांत दामले यांच्या गाण्याचा प्रत्यय वारंवार येईल. घरातले फ़र्निचर, सॉफ़्ट फ़निर्शिंग याबाबत नीट रचना करायला आता वेळ मिळेल. शिवाय आजवर ज्या घरगुती साधनांचा सोय म्हणुन वापर करायला जमले नसेल तो मोड आता सापडेल.

इतके सारे चांगले  घडत असताना घरातल्या माणसांशी संवाद घडत नाही ही रुखरुख मात्र असेल. दरवेळेला शाब्दीक संवादच सर्वकाही असते असे नाही. घरातले सगळे आनंदात दिसत आहेत ही स्थिती पाहून आनंदी नसाल तर नवलच.

सिंह रास : तुमच्या राशीचा मालक महिनाभर वृश्चिक या राशीत मुक्कामाला आहे. तुमचे जे काही आहे ते खुले. कोल्ह्याच्या चालीने छुपे काही करावे हा तुमचा स्वभाव नाही. तरी सुध्दा छुपे पणाने झोपल्याचे सोंग आणून जरा पहा तुमच्या आजूबाजूला काय घडते आहे. कोण तो उंदीर तुम्ही झोपला हे पाहून तुमची आयाळ कुरतडायला येतो ते या महिन्यात शोधून ठेवा.

सिंह राशीची अनेक माणसे कलाकार असतात. तुळेत गेलेला शुक्र आपल्याला काही लिखाण करायला स्फ़ुर्ती देईल. जरा त्याचा अनुभव घेऊन पहा. शेअर मार्केटमधे जरा जपून रिस्क घ्या. या महिन्यात तुमचे नियमीत येणारा पगार आणि गुंतवणूक या बाबत जरा जागरुक रहा.

उच्च शिक्षण घेणारे विद्यार्थी यांनी ६ ते १० डिसेंबर या काळात परिक्षा आल्यास अती आत्मविश्वासाने परिक्षा देऊ नये. नेहमी पेक्षा जरा जास्तच अभ्यास करावा तसेच खेळाडू, पोलीस यांनी ही ह्या काळात अति आत्मविश्वास दाखवू नये.

कन्या रास : कन्या राशीचा मालक बुध जवळ जवळ महिनाभर वक्री असल्यामुळे कन्या राशीच्या लोकांनी आपले नोकरी/व्यवसायातले काम काळजीपुर्वक करण्याची आवश्यकता आहे. खास करुन अकाऊंटस, कम्युनिकेश्न, प्रिटींग यात काही चुका होऊ नयेत म्हणून सर्व माहिती पुन्हा तपासणे आवश्यक आहे.

कौटुंबीक वातावरणात अजिबात ताण नसेल. भेळ पुरी, पास्ता, पिझ्झा या सारख्या पदार्थांचा आस्वाद घेण्याचे क्षण अनेकदा या महिन्यात येतील. नात्यामधल्या अनेक स्त्रीया जसे बहिणी, मावश्या यांचे संमेलन घरात भरेल. यामुळे बंधू वर्गाला विनाकारण अस्वस्थता येणार नाही ना या साठी खुलासा करणे आवश्यक ठरेल.

जे पत्रकार आहेत, संपादक आहेत यांनी आपल्या लिखाणामुळे शत्रूता निर्माण होणार नाही ना याचा विचार करुन लेखन करावे. सोशल मिडीया वर जे कायम लिहीतात त्यांनी सुध्दा आपण काय लिहीतो, काय फ़ॉर्वर्ड करतो हे तपासून मगच कृती करावी.

तुला रास : आपल्या राशीचा स्वामी शुक्र महिनाभर तुला या स्वत:च्या राशीत असणार आहे. कलाकारांच्या साठी हा महिना उत्तम असेल.  खरेदी विक्री करणारे व्यापारी, सौंदर्य प्रसाधनाचे व्यवसाय करणारे, सुगंधाचे व्यापार करणारे यांना या महिन्यात खुप उलाढाल करण्याचे योग आहेत.

कलाकारांना आपण कोणत्या अ‍ॅगलने छान दिसतो याचा शोध लागेल आणि त्याचा वापर करुन ते जास्त प्रसिध्दी मिळवतील. स्वत:ची सेल्फ़ी काढण्यात गर्क असलेल्या लोकांना सुध्दा हे अ‍ॅगल सापडतील. काहींना लाईफ़ इन्शुरन्स पॉलीसी संपल्यामुळे, लॉटरीच्या तिकीटामुळे पैसे मिळतील.

किरकोळ आरोग्याचे प्रश्न डोके वर काढू नयेत म्हणुन काळजी घ्यावी. काही आर्थिक जबाबदार्या मात्र नको असताना घ्याव्या लागतील. पण हे सर्व व्यवस्थीत मॅनेज करता आले तर हा महिना चांगला जाईल.

वृश्चिक रास : खरे बोललेले सख्या आईला पटत नाही हा अनुभव या महिन्यात येईल. एकंदरीत घरगुती संघर्षाचे वातावरण असेल यासाठी आपली भुमिका तपासून, शब्द विश्वासार्ह असतील असे पहावे म्हणजे सगळे नियंत्रणात राहील.

या महिन्यात आपल्या हातात येणारे धनादेश ( चेक्स ) यावरची तारीख व रक्कम इत्यादी तपासून घ्यावी. कॅशीयर मंडळींनी नोटा तपासून घ्याव्यात अन्यथा फ़सगत होण्याची शक्यता आहे.

वृश्चिक राशीला या महिन्यात खर्चाची जुळवणी करताना बेजार होण्याचा हा महिना आहे अश्यावेळी कामात गडबड होऊन अजून भुर्दंड नको म्हणून वर लिहील्याप्रमाणे रोखीचे, कॅश चे व्यवहार तपासून पहावेत.

धनू रास : धनू राशीतील मूळ नक्षत्राचा साडेसातीचा त्रास कमी होईल.  आता शनि पुर्वाषाढा नक्षत्रात २७ नोव्हेंबरला प्रवेश करत आहे. ज्यांचे धनू राशीत पुर्वाषाढा नक्षत्र आहे त्यांना साडेसातीत अनेकदा मनस्ताप होईल. असे जरी असले तरी या महिन्यात आवक जोरदार असेल. या सोबत अनेक लाभकारक गोष्टी या महिन्यात आपल्याला मिळणार आहेत.

नोकरी व्यवसाया निमीत्ताने या  महिन्यात काहींना खुपच प्रवास करावा लागेल तर काहींना प्रवासाचे बेत  काही अडचणीमुळे रद्द करावे लागतील. धनू राशीचा मालक गुरु वर्षभर बाराव्या स्थानी असणार आहे. त्याच्या सोबत रवि आणि बुध असल्याने प्रवासा बरोबरच खर्च सुध्दा जास्त असणार आहे. एका बाजूला उत्तम आवक आणि खर्च सुध्दा असल्याने महिन्याची गोळाबेरीज शेवटी शुन्य असेल.

मकर रास : हा महिना आपल्या नोकरी/व्यवसायात भक्कम परिस्थीती बनविणार आहात. यामुळे जेंव्हा केंव्हा बढती किंवा पगारवाढ मिळेल तेंव्हा आपले कर्तुत्व कोणी नाकारू शकणार नाही. या महिन्यात शिलकीत असलेले पैसे कसे चांगल्या पध्दतीने गुंतवणूक करायचे यावर निर्णय घ्यायला लागणार आहे. पैसे कसे साठवायचे आणि वाढवायचे यावर आपला खुप अभ्यास असल्याने गुंतवणूकीचे निर्णय बरोबरच असतील.

आपल्या घरात असलेले नोकर आणि नोकरी- व्यवसायात आपले कनिष्ठ काय करत आहेत याचा अंदाज घ्या. अनेक वर्ष आपण ज्यांना खात्रीचे, विश्वासाचे वाटणारे हे लोक आपल्याला अडचणीत आणणार नाहीत ना याची काळजी घ्यायची आवश्यकता आहे. ही बाब नियंत्रणात ठेवली तर हा महिना आपल्याला चांगला जाईल.

कुंभ रास : कुंभ राशीचा मालक शनि लाभ स्थानात अजून खुप काळ असणार आहे त्यामुळे कुंभ राशीची अजून काही काळ चांगली स्थिती आहे. अकारण चिड चिड करणे हा अपला स्वभाव नाही तरी सुध्दा मंगळ महिनाभर कुंभ राशीत असल्यामुळे थोडीशी चिड चिड होईल.

या महिन्यात राजयोग कारक शुक्र स्वत:च्या राशीत भाग्यात असल्याने महिनाभर सुख लाभेल. उच्च शिक्षण घेणार्यांना हा काळ अनुकूल असेल. या काळात एखादा कठीण विषय देखील सहज समजेल. अनेकांना वरिष्ठांच्या गैरहजेरीत जास्तीचे अधिकार मिळतील.

आपल्या पित्याशी विनाकारण संघर्ष होण्याची शक्यता असल्यामुळे जो विषय खात्रीने संघर्ष निर्माण करेल असा विषय या महिन्यात टाळलेला चांगला.

मीन रास : ११ अक्टोंबर नंतर वर्षभराने प्रथमच चांगले वातावरण तयार होत आहे. राशीचा स्वामी गुरु चांगल्या स्थितीत आलेला आहे जो पुढे तीन वर्षे उत्तम स्थितीत असणार आहे. तीन महत्वाचे ग्रह बुध, रवि आणि गुरु चांगल्या स्थितीत आल्यामुळे आपण जे करणार आहात त्याच्या प्लॅनिंग साठी हा काळ अनुकूल असेल. उत्साहाने कामाला लागा.

जितके नियोजन अर्थात प्लॅनिंग उत्तम तितक्या अडचणी कमी व दैनंदीन कामे मार्गी लागतील. जेंव्हा अनेक छोटे टप्पे पार पाडाल तेंव्हाच मोठे यशाचे शिखर गाठू शकाल याचा विश्वास ठेऊन काम सुरु ठेवा. नजीकच्या काळात अजून काही ग्रह आपल्या यशाकडे जाण्याच्या मार्गावर आपल्याला सहाय करतील

शुभंभवतू

Friday, October 5, 2018

नक्षत्रप्रकाश दिवाळी अंक २०१८

                                                                 



                                                                   अनुक्रमणिका

Saturday, September 15, 2018

नक्षत्रप्रकाश ज्योतिष संमेलन २८ अक्टोंबर २०१८ संदर्भातले निवेदन

२८ अक्टोंबर २०१८ ला आपण संमेलन घेण्याचे घोषीत केले आहे. या संदर्भात या संमेलनाचे शुल्क, स्थान व रुपरेषा १ अक्टोंबर २०१८ रोजी मिळेल. या संदर्भात पुढे जाऊन हे संमेलन पिंपरी- चिंचवड शहरात होईल असे मी आज जाहीर करतो. याचे कारण इतर शहर अर्थातच बाहेर गावाहून येणार्या लोकांसाठी पुणे शहर सोयीचे आहे परंतु कार्यकर्ते मिळणे किंवा संमेलनाचे आयोजन करणे या दृष्टीने मला पिंपरी चिंचवड शहर सोयीचे वाटते.

या संमेलनात व्याख्याने होतील, नक्षत्रप्रकाश दिवाळी अंक प्रसिध्द होईल. संमेलनाच्या शुल्कामध्ये तो संमेलनास येणार्यांना उपलब्ध होईल.

संमेलनात व्याख्यान देण्यासाठी जे व्याख्याते निवडले जातील त्यांना संमेलनाचे शुल्क द्यावे लागणार नाही.  व्याखानाचा विषय असा असावा जो क्लिष्ट नसेल. ३० ते ४० मिनीटांच्या व्याख्यानात तो सर्वांना समजेल व त्या माहितीचा वापर लगेचच अनेकांना करता येईल. जे विषय आधीच तुम्ही आधी कधी तरी बोलला आहात त्याची पुनरावृती टाळावी.

निवडलेल्या व्याख्यानाच्या आधी व्याख्यात्याबद्दल माहिती सांगीतली जाईल. ज्यात व्याख्यात्याने ज्योतिष विषयक शिक्षण कोठे घेतले. कोणत्या पदव्या त्यांनी घेतल्या आहेत. त्यांचे ज्योतिष विषय सोडता नोकरी/व्यवसाय काय आहे/होता. आजवर त्यांनी कोठे कोणत्या विषयावर
व्याख्याने दिलेली आहेत इत्यादी. या नंतर व्याख्यान ३० ते ४० मिनीटे असेल. शेवटची ५ ते १० मिनीटे प्रश्नोत्तरासाठी असतील.

संमेलनाच्या दिवशी जेमतेम ४ ते ५ व्याख्याने होऊ शकतील परंतु ज्यांना व्याख्यानाची संधी मिळणार नाही किंवा उत्तम विषयावर व्याख्यान देणे शक्य असून जे प्रवास करुन येऊ शकणार नाहीत त्यांच्या साठी नक्षत्रप्रकाश दिवाळी अंक ही दुसरी संधी उपलब्ध आहे. आपण त्वरीत संपर्क करावा. विनंती इतकीच आपण लिहीत असलेला लेख हा प्रथमच प्रसिध्द होत असावा. यात अगदी प्रार्थमीक माहिती नसावी तर अभ्यासपुर्ण केस स्टडी असावा. तुम्हाला नक्षत्रप्रकाश दिवाळी अंक विनामुल्य घरपोच प्राप्त होईल.

तसेच जे प्रकाशक/लेखक आपले पुस्तक या संमेलनात प्रकाशीत करु इच्छितात त्यांनी त्वरीत संपर्क करावा. ज्यांचे पुस्तक प्रसिध्द झाले आहे आणि ज्यांना प्रसिध्दी करायची आहे त्यांनी ही संपर्क करावा. नक्षत्रप्रकाश दिवाळी अंकात या प्रसिध्द झालेल्या पुस्तकाचा गोषवारा दिला जाईल.  जे सदस्य/प्रकाशक/ विक्रेते आपली ज्योतिष विषयक पुस्तके विक्रीस ठेऊ इच्छितात त्यांनी माझ्याशी संपर्क करावा. हे सर्व करण्याचा उद्देश संमेलनाच्या खर्चाचा काही भाग उचलला जावा ही आहे. लेखक/प्रकाशक आणि विक्रेते यांनी या निमीत्ताने संमेलनास स्वतंत्र जास्तीचा निधी द्यावा अशी अपेक्षा आहे. संमेलनात सहभागी होण्याच्या शुल्कातच पुस्तक प्रसिध्द करणे/ आधीच प्रकाशीत पुस्तकाला नक्षत्रप्रकाश मधे प्रसिध्दी देणे किंवा विक्रीस ठेवणे शक्य होणार नाही याची नोंद घ्यावी.

जे सदस्य यंत्र/रत्ने/उपरत्ने संमेलनाच्या ठिकाणी विक्रीसाठी स्टॉल लाऊ इच्छितात त्यांना सुध्दा संपर्क करावा अशी विनंती आहे. या संदर्भात आपल्या सुचनांचे स्वागत आहे. आपणही काही निधी द्यावा अशी अपेक्षा आहे.

ज्यांना यंत्र/रत्ने विक्री स्टॉल लावायचा नाही, पुस्तकही प्रसिध्द करायचे नाही परंतु हे एक चांगले काम आहे या भावनेने रुपये १००/- पासून कितीही असा निधी उदार अंतकरणाने द्यायचा आहे अश्या ज्योतिषप्रेमींचे स्वागत आहे. ज्यांना असे वाटते की मी आजवर नक्षत्रप्रकाश समुहावर मोफ़त सल्ला घेतला त्याची परत फ़ेड म्हणून काही रक्कम संमेलन निधी साठी द्यायची आहे त्यांचे ही स्वागत आहे.  हा वेगळ्या अकाउंटला जमा करायचा आहे. याबाबतची माहिती घेण्यासाठी त्वरीत फ़ेसबुक मेसेंजर/ whatsapp वर संपर्क करावा.

संमेलनात सहभागी होण्यासाठी शुल्क वेगळे असेल. ते वेगळ्या अकाउंटला जमा करायचे आहे याची नोंद घ्यावी. याची घोषणा व्याख्याते नक्की झाल्यावर १ अक्टोंबरला केली जाईल.

जे लोक संमेलनात सहभागी  शुल्क आधी जमा करतील त्यांना अनुक्रमानुसार पुढच्या रांगेत बसण्याची व्यवस्था करुन दिली जाईल. जे उशीरा आपले स्थान निश्चित करतील त्यांना स्टेज पासून मागे जागा मिळेल अशी व्यवस्था करण्याचा विचार आहे.

१ अक्टोबर नंतर एक बॅकेचे अकाऊंट प्रसिध्द होईल. संमेलनात सहभागी होणार्यांनी त्यात आपले शुल्क जमा करायचे आहे. याच दिवशी या संमेलनात किती लोक सहभागी होऊ शकतात याचा आकडा नक्की होईल. त्या पेक्षा जास्त प्रतिसाद मिळाला तर मात्र निराशा होऊ नये या साठी १ अक्टोंबरच्या घोषणेकडे लक्ष द्यावे ही विनंती.

ह्या संमेलनात पिंपरी- चिंचवडचे/पुणे  रहीवासी नसलेले परंतु स्वयंसेवक म्हणून काम करायचे आहे अश्यांचे सुध्दा स्वागत आहे.

हे संमेलन यशस्वी व्हावे या साठी सुचनांचे स्वागत आहे.

नितीन जोगळेकर
9763922176

Tuesday, September 11, 2018

१७ सप्टेंबर २०१८ ते १६ अक्टोबर २०१८ या कालावधीचे राशीभविष्य तसेच विवाह होण्यासाठी उपाय

नमस्कार, ज्योतिषप्रेमी लोकहो. मी घेऊन आलो आहे १७ सप्टेंबर २०१८ ते १६ अक्टोबर २०१८ या कालावधीचे राशीभविष्य. या महिन्यात रवि कन्या राशीत आहे. ज्योतिषशास्त्र दृष्टीने महत्वाचा बदल होत आहे. ११ अक्टोंबर २०१८ रोजी गुरु तूळ राशीतून वृश्चिक राशीत प्रवेश करत आहे. महिन्याच्या राशी भविष्यात इतका मोठा ज्योतिषशास्त्रीय लेख लिहणे शक्य नाही यासाठी हा लेख मी दिवाळी अंक २०१८ मधे लिहणार आहे.

तेंव्हा प्रतिक्षा करा दिवाळी अंकाची. यात वार्षीक राशीभविष्य नोव्हेंबर २०१८ ते अक्टॊंबर २०१९ कालावधीचे असेल. याच सोबत गुरु बदलाचा स्वतंत्र लेख असेलच. कोणत्या राशीला गुरु बदलाने नेमका काय लाभ होईल हे दिवाळी अंकातच वाचा. या शिवाय अनेक अश्या माहितीने नटलेला नक्षत्रप्रकाश दिवाळी २०१८ - २८ अक्टोंबर २०१८ रोजी प्रसिध्द होईल. प्रिंट कॉपीची मागणी आत्ताच नोंदवा. यासाठी देणगी मुल्य असेल. ते कसे द्यायचे या बाबत स्वतंत्र माहिती आपणा पर्यंत येईलच.

दर महिन्याला मी काही उपाय सांगत असतो. ह्या महिन्यामधे नवरात्र सुरु होत आहे. यादृष्टीने मी अनुभवलेले उपाय आपल्यापर्यंत मी पोचवत आहे.

ज्या विवाहासाठी इच्छुक कन्यांचा विवाह लांबला आहे, अडचणी आहेत. प्रेम विवाह करायचा आहे पण त्यात अडचणी आहेत अश्या सर्व कन्यांनी हा उपाय जरुर येता १३ अक्टोबरला करावा व आपला अनुभव कळवावा. हा उपाय असलेली खालील लिंक विवाह इछुक मुलींना पाठवावी. १३ अक्टोबर २०१८ च्या आधी पाठवावी म्हणजे तयारी करता येईल.

http://gmjyotish.blogspot.com/2016/09/blog-post_22.html

हा उपाय, विवाह इच्छुक मुलींनीच करायचा आहे. त्यांच्या साठी त्यांच्या वतीने अन्य कोणी केल्यास फ़ायदा होत नाही

आता  १७ सप्टेंबर २०१८ ते १६ अक्टोबर २०१८ या कालावधीचे राशीभविष्य पाहू. हे राशीभविष्य लग्नराशीकडून तसेच चंद्र राशीकडूनही पहावे.

मेष रास: या महिन्यात आपल्या राशीचा स्वामी मंगळ कर्म स्थानी असला तरी अनेक कामे तुमच्या इच्छा शक्तीने मार्गी लागण्यात काही अडथळे महिन्याच्या सुरवातीपासूनच संभवतात. ही स्थिती महिन्याच्या शेवटापर्यंत कायम असेल. यासाठी अडथळे काय येतील याचा अंदाज आत्तापासून लाऊन त्यावर परिणामकारक उपाय शोधा.

आपल्या राशीचा महत्वाचा ग्रह गुरु  पुढे वर्षभर अशुभ स्थानी असल्याने ११ तारखेच्या आधी काही अत्यंत महत्वाची कामे मार्गी लावाच. ह्या महिन्यात तुमचे मामा तुमच्यावर प्रसन्न असतील. मामांच्या सहायाने काही कामे मार्गी लावायची असतील तर ६ अक्टोंबर पुर्वी मार्गी लावा.

हा संपुर्ण महिन्याच्या कालावधीत मेष राशीचे विद्यार्थी कोणतीही परिक्षा देणा्र असतील तर अपेक्षे इतके यश मिळवण्यासाठी दुप्पट अभ्यास करणे आवश्यक आहे. आपल्या संततीच्या बाबतीत सुध्दा सहामही परिक्षेच्या कालावधीत आजारपण येऊ नये म्हणून  काळजी करा.

या महिन्यात काही रोमॅंटीक क्षण अनेकांना अनुभवायला मिळतील. एकंदरीत अनेक वैविध्यपुर्ण घटनांनी भरलेला हा महिना मेष राशीसाठी आहे.

वृषभ रास: तुमच्या राशीचा स्वामी शुक्र स्वत:च्या राशीत असूनही तुम्हाला सर्व सुख समोर असताना, आनंद घेण्यास अडथळे निर्माण होतील. हे म्हणजे अनेक गोड मेजवान्या रक्तातील साखर वाढल्याने आस्वाद घेता येणार असे असेल. व्यावसायीक स्तरावर अनेक कामे तुमचे सहकारी एकदा सांगून मार्गी लावतील पण त्यासाठी ५ अक्टोबर पुर्वी महत्वाची कामे मार्गी लाऊन घ्या. 

आपण उच्च शिक्षणासाठी प्रयत्नात असेल तर त्या संदर्भात चांगली बातमी समजेल. आपली संतती बौध्दीक क्षेत्रात काहीतरी जोरदार काम पुर्ण करेल. महिन्याच्या शेवटी आरोग्याचे प्रश्नाने वर्षभर त्रास झाला असेल तर त्यावर चांगला उपाय सापडेल. अडकून पडलेले पैसे मार्गी लागतील.

सर्वात महत्वाचे म्हणजे आपल्या राशीचा राजयोग कारक ग्रह शनि मार्गी झाल्याने अनेक रखडलेली कामे वेगाने नाही पण हलू नक्कीच लागतील. तुमच्यासाठी सुध्दा हा महिना अनेक घटनांनी भरलेला असेल.

मिथून रास: ऑफ़िसला जाणे हा रोजचा प्रवास महिनाभर तुम्हाला सुखाचा झालेला वाटेल. बसेस वेळेवर येतील. नेहमी ट्रॅफ़िक जाम होणार्या जागी जाम लागणार नाही. तुमचे स्वत:चे वहान दगा देणार नाही. काही दिवस का होईना हे सुख अनुभवा. आपली भावंडे लांब असतील तर काही दिवस त्यांचा सहवास लाभेल.

या महिन्यात काही लिखाण करायचे असेल तर ५ अक्टोंबर पुर्वी पुर्ण करा. कोणत्याही विषयाच्या अभ्यासासाठी हा काळ अनुकूल आहे. आपली संतती सुध्दा आपल्याला आनंद देणार आहे. आणि हो कोणाला तरी प्रपोज करायचे असेल तर बिनधास्त करा. असा हा काळ मिथुन राशीच्या लोकांना जोरदार असणार आहे.  तरी सुध्दा प्रकृतीच्या काही तक्रारी असतील. पित्ताचा त्रास असणार्या लोकांनी विशेष काळजी घ्या.

कर्क रास: कोणतेही यश मिळण्यासाठी अनेक प्रयत्न करावे लागतात. यासाठी संवाद साधणे हा सुध्दा एक प्रयत्नच असतो. या महिन्यात संवाद यशस्वी रित्या साधला जाईल. तो इमेल च्या माध्यमातून असू दे, प्रेझेंटेशन असू दे किंवा इंटरव्ह्यु, संवाद यशस्वी होईल. या महिन्यात अनेक लेखक, प्रकाशक आणि प्रिंटींग व्यवसायात असलेले लोक एखादा महत्वाचा टप्पा पार पाडतील. शैक्षणीक क्षेत्रात असलेल्या लोकांना मात्र संधीचा फ़ायदा घेण्यासाठी खुपच आटापीटा करावा लागेल.

घरगुती स्तरावर भावंडांची चिंता असल्यास दुर होईल. घरात एखादी भौतीक सुखाची वस्तू जसे फ़र्निचर, वाहन इ येण्याचा योग या महिन्यात पाच तारखेच्या आधी असेल. काही कारणाने जोडीदाराशी असलेला संवाद हरवला असे गेले काही महिने वाटत असेल तर तो पुन्हा निर्माण होईल. लांबलेले एखादे दुखणे नियंत्रणात येईल. असे मिश्र ग्रहमान असलेला हा महिना कर्क राशीच्या लोकांना अनुभवायला मिळणार आहे.

सिंह रास: आपल्या राशीचा स्वामी रवि महिनाभर कन्या राशीत असेल. कन्या राशीत रवि गेल्यावर आपल्या खाण्यापिण्याच्या आवडी पुर्ण होण्यास हा खास काळ येतो. घरातल्या लोकांच्यावर गुरगुरु करुन तुम्ही हवे ते तयार करायला सांगणार आणि इतरांना शिल्लक रहाते अथवा नाही याचा फ़ारसा विचार न करता त्याचा स्वाद घेणार. आपला स्वभाव घरच्यांना माहित आहे त्यामुळे तुम्ही आनंद घ्या.

या महिन्यात अधिकार, पद, मान सन्मान या ही पेक्षा पैसे कसे गुंतवायचे यावर जेणे करुन ते कठीण प्रसंगी उपयोगी पडतील यावर विचार करायला वेळ मिळेल शिवाय चार पैसे सेव्हिंग अकाउंटला दिसतील सुध्दा एखाद्या चांगल्या हितचिंतका बरोबर या बाबतीत हितगुज करा. सिंह राशीचे अनेक लोक चांगले कलाकार असतात. या महिन्यात आपल्याला कला प्रदर्शनासाठी उत्तम संधी येणार आहे त्याचा फ़ायदा घ्या. आपल्याला लगेचच सिनेमा मिळणार असे नाही पण अभिनय करायला पथ नाट्यापासून कोणतीही संधी तुम्ही सोडु नये कारण त्यातूनच अभिनय कौशल्य संपन्न होत असते.

कन्या रास: तुम्ही मुळात चिकीत्सक, संशोधक आणि ही तुमची वृध्दींगत करण्यासाठी ६ अक्टोंबर पर्यंत राशीचा स्वामी बुध लग्न स्थानी असेल. आपण ज्याची चिकीत्सा कराल ते अचूक असेल. डॉक्टर असा किंवा चार्टर्ड अकाउटंट असा आपल्याला आपल्या कामाचे समाधान मिळेल व आत्मविश्वास वाढेल.

महिनाभर ज्या गोष्टीची काळजी कराल ती विनाकारण असणार नाही. पुढील महिना केवळ चिंता करु नका पण ही स्थिती पुन्हा येऊ नये म्हणून काहीतरी मुलभूत काम करा. या दृष्टीने काही आर्थिक नियोजन करायला हा महिना अनुकूल आहे मात्र हे सर्व निर्णय ५ अक्टोंबर पुर्वी घेतले जातील असे पहा.

तूळ रास : तुमच्या राशीचा स्वामी खुप काळ तुमच्या राशीत असणार आहे. महिनाभर विवीध घटना घडतील. प्रवास, तिर्थयात्रा यांचे योग येतील. या महिन्यात हा खर्च अनपेक्षित असला तरी सुध्दा त्याची तरतुद करणारा आहे त्यामुळे तिर्थ यात्रा बाबत संधी येताच हो म्हणा. या महिन्यात आपण आनंदी असाल याचे कारण तुम्हाला अपेक्षीत व्यावसायीक संधी, कला प्रदर्शनाच्या संधी, उत्कृष्ट सुगंध, कपडे इ. आवडणारे सर्व काही सहज प्राप्त होणार आहे.

याच सोबत ६ अक्टोंबर नंतर होणार्या कटकटी, इतरांसाठी होणारे अनावश्यक खर्च, डोळ्याचे आजार याने वैतागून न जाता यावर काय पर्याय आहे याचा विचार करावा. केवळ आपल्या सोबत राहीले म्हणजे काही खर्च करावा लागत नाही अश्या विचार करणार्या स्वार्थी मित्रांना जरा टाळा म्हणजे हे अनावश्यक खर्च नियंत्रणात राहतील.

वृश्चिक रास : आपल्या राशीचा अधिपती मंगळ २७ ऑगस्टला मार्गी झाला असला तरी कटकटी संपलेल्या नाहीत. सध्या मंगळाचे केतू सोबत साहचर्य असल्याने कामे मार्गी लागताना अनंत अडथळे यांचा सामना करावा लागेल. फ़ार धाडस दाखवून काम करु नका तर जरा शांत राहून अंतर्मनाचा कौल घेऊन दुरगामी विचार करुन पावले टाकण्याची आवश्यकता या महिन्यात जाणवेल.

या महिन्यात पैशाची आवक चांगली असेल. रवि आणि बुध दोन्ही ग्रह भरपूर आवक या महिन्यात देतील. जुनी येणी वसूल होतील. त्यामुळे खर्च वाढला तरी तरतुद कशी करावी ही चिंता असणार नाही. या महिन्यात गुरु जो आपल्या खर्चाच्या, चिंतेच्या जागी बसून अस्वस्थता गेले वर्षभर वाढवत होता तो या महिन्यात आपले स्थान बदलून आपल्या राशीत येणार आहे. गुरूबदलाचे फ़लित दिवाळी अंकात वाचा.

धनू रास: आपल्या राशीला एक महत्वाचा बदल या महिन्याच्या अखेरीस होणार आहे तो म्हणजे गुरु बदल पण त्या बाबत स्वतंत्रपणे दिवाळी अंकात वाचा. हा महिना या वर्षभरातला असा आहे की जे काही मार्गी लावायचे असेल ते ह्याच महिन्यात ११ अक्टोंबर पर्यंत लावा. या नंतर मात्र खुप खर्च, मनाविरुध्द घटना यात वाढ होईल.

वरील लिहलेले वर्षभर अनुभवयास कमी अधीक प्रमाणात आले तरी हा महिना मात्र नोकरी/व्यवसायाच्या दृष्टीने उत्तम असेल. नोकरी/व्यवसायात अनेक संधी चालून येतील. अधिकार वाढेल तसेच व्यावसायिकांना उत्पन्न नाही तर उत्पन्नाचे अनेक स्त्रोत वाढल्याचे लक्षात येईल. नविन निर्माण झालेल्या स्त्रोत कायमचे कसे हातात राहतील यावर विचार करा.

मकर रास : कितीही मनाविरुध्द घडले तरी शांत रहायचे हा आपला स्वभाव काही दिवसांकरता अचानक बदलत आहे असा भास नाही तर आपल्या राशीत आलेल्या मंगळाच्या मुळे सत्यात उतरेल. अर्थात डोक्यात राख घालून कडक रिअ‍ॅक्शन तुम्ही देणार नाही परंतु नापसंती नक्कीच दाखवाल. इतका आपला अधिकार आहेच तो कधीतरी दाखवायला काय हरकत आहे ?

महिनाभर अनेक हातात आलेल्या संधी विनाकारण जाऊ नयेत म्हणून प्रयत्नशील असा हे सांगण्याची आवश्यकता नाही हा आपला स्वभाव आहे. पण या साठी महिनाभर जागरुक रहा. प्रमोशन हातचे जाऊ नये म्हणुन लक्ष द्या. ५ अक्टोंबर नंतर असे घडू नये यासाठी हालचाल करा. संधी गेली म्हणजे परत येत नाही असे नाही परंतु काही काळ मात्र तसाच जातो हे निश्चित लक्षात असू द्या.

कुंभ रास : आपल्यासाठी हा महिना काही फ़ारसा चांगला नाही. निष्कारण खर्च, चिंता, आजारपण याने व्यापलेला असेल. वैवाहीक जोडीदारासोबत अनावश्यक संघर्ष होऊ नये म्हणून कोणत्या विषयात पडायचे नाही हे ओळखून कटुता कमी करता येईल. नोकरी / व्यवसायाच्या निमीत्ताने प्रवास आहे पण तो सुखकारक व्हावा यासाठी काळजी करा. प्रवासात काही हरवणार नाही, फ़सवले जाणार नाही यासाठी जागृत रहा.

नाही म्हणायला स्पेक्य़ुलेशच्या संधी या महिन्यात येतील पण किती कुंभ राशीचे लोक शेअर्स, रेस किंवा तत्सम भानगडीत पडतात ? त्या पेक्षा एखादे लॉटरीचे तिकीट काढा. किंवा जिथे खरेदी केल्याने काही लकी ड्रॉ काढला जाणार आहे तिथे गंमत म्हणुन नशीब अजमाऊन पहा. याच्या फ़ार नादी लागू नका हे तुम्हाला सांगायची आवश्यकता नाही.

मीन रास: आपल्या राशीला या महिन्यात काही पैसे बिनकष्टाचे मिळणार आहेत यास्तव एखादी स्मरणात न राहीलेली मॅच्युअर होऊ पहाणारी विमा पॉलीसी तपासा जी अकस्मात बोनस देऊन जाईल किंवा वारसा हक्काने येणारे धन, लॉटरी इ. ने मिळणारे धन या महिन्यात मिळेल. दिवाळी साठी हा मोठा आनंददायक दिलासा असेल.

आपल्या वैवाहीक जोडीदार किंवा वुड बी/प्रेमपात्रा सोबत चांगला काळ जाईल तसेच संघर्ष सुध्दा होईल. यात बॅलन्स कसा साधायचा यासाठी कसरत करावी लागणार आहे. " तुमको जो पसंद वही बात करेंगे, तुम दिन को अगर रात कहो रात कहेंगे " या जुन्या हिंदी गाण्याच्या ओळी लक्षात ठेवल्यात तर जो काळ चांगलाच असेल त्याही काळात आधीच्या घटनांनी मुड गेला असे होणार नाही.

शुभंभवतु