Showing posts with label astrology. Show all posts
Showing posts with label astrology. Show all posts

Sunday, January 26, 2020

तानाजी, छपाक चोरीचा मामला आणि सिनेमाचे यश आणि ज्योतिषशास्त्रीय विचार

सिनेमा ही सिनेमातल्या कलाकारांनी  केलेल्या कलेचे प्रत्यक्ष प्रदर्शन नसून फ़ोटोग्राफ़ी आहे. कलाकारांच्या कलेचे प्रत्यक्ष प्रदर्शन म्हणले तर ते नाटक आहे. म्हणून नाटक हे शुक्राच्या अंमलाखाली येते तर कोणतीही फ़ोटोग्राफ़ी ही राहूच्या अंमलाखाली येते. नाटकात मुळ संहीता जरी बदलत नसली तरी जितके प्रयोग करु तितके वेळा कलात्मक बाजू सुधारण्याची संधी असते तसे सिनेमाचे नाही. एकदा रिलीज झाला की त्यात बदल होत नाही. सर्वात महत्वाचे म्हणजे राहूच्या अंमलाखाली असलेल्या गोष्टींचा बेभरवशीपणा.

अनेक दिवस माझा असा समज होता की जितके सिनेमे कै.शाहीर दादा कोंडके यांनी दिले तितके सर्व सिल्वर जुबिली हीट झाले. पण तस नाही. दादा कोंडके यांचे काही सिनेमे सिल्वर ज्युबिली झाले नाहीत.

राहूच्या अंमलाखालील सिनेमाचा बेभरवशी कारभार एखाद्या निर्मात्याला, कलाकाराला इतकी प्रसिध्दी देऊन जातो तर कित्येकांना देशोधडीला लावतो. अमिताभचा सिनेमा चालला म्हणून अमिताभची सिनेमा तयार करण्यासाठी लागणारे सेट्स पुरवणारी कंपनी चालली नाही आणि अमिताभ ला कोर्टाच्या कारवाईला सामोरे जावे लागले.

राहूच्या अंमलाखालील बेभरवशी गोष्टींमुळे निर्माता सिनेमाच्या टाय़टल पासून, कलाकारांच्या सिलेक्शन मधे सुध्दा ज्योतिष, न्युमरोलॉजी, मुहूर्त याचा उपयोग करुन सिनेमाचा व्यवहार नियंत्रीत करु पहातो.

महेश कोठारे यांच्या सिनेमाची नावे पाहीली तर झपाटलेला, धुमधडाका, धडाकेबाज, पछाडलेला,थरथराट, देदणादण किंवा खबरदार पाहीले तर यात पाच अक्षरे दिसतात. अर्थात सिनेमाचे टायटल पाच अक्षरांचे म्हणजे सिनेमा चालणार असा काही फ़ॉर्म्युला नाही अन्यथा पाच अक्षरे असलेले सिनेमे पडायलाच नको. पण तसे नाही. शेवटी प्रेक्षकांना अपेक्षीत करमणूक देताना सिनेमात खर्च झालेला पैसा किमान वसूल व्हावा ही निर्मात्याची माफ़क अपेक्षा असते, या शिवाय कलाकारांना प्रसिध्दी मिळावी, कलाकारांचा ब्रॅड तयार व्हावा ही अपेक्षा कलाकारांची असते. सिनेमा चालला किंवा सुपर हीट झाला तर तो बोनस. यामुळे सिनेमाचा मुहूर्ताचा शॉट, रिलिझ करण्याची तारीख, टायटल न्युमरोलॉजी इथपासून कलाकारांच्या जन्मकुंडली पाहून सध्या प्रसिध्दीचा काळ आहे किंवा नाही इथपर्यंत ज्योतिष विषयावरचे मार्गदर्शन घेतले जाते.
Chappak

१० जानेवारी २०२० ला दोन सिनेमे रिलीझ झाले. एक होता छपाक तर दुसरा तानाजी. छपाक बॉक्स ऑफ़िसवर आपटला. ह्या सिनेमाने निर्मात्याने केलेला खर्च जेमतेम भरुन काढला अशी माहिती आहे तर तानाजी मात्र जोरदार चालला. थोडक्यात एकाच दिवशी रिलीझ झालेले सिनेमे रिलीझच्या दिवसाचे पंचांग पाहून चालतात असे नाही. पण सिनेमा तयार झाल्यावर मात्र अनेक निर्माते, त्यांचे फ़ायनान्सर आणि कलाकार एकत्रीत सिनेमा पहात असतील तेंव्हा याचे भविष्य लक्षात आल्याशिवाय रहात नाही. मग रिलीझ च्या तारखेचे अर्थात त्या दिवसाच्या पंचांगाचे महत्व लक्षात येते. माझी खात्री आहे की छपाक सिनेमाची निर्माती आणि कलाकार दिपीकाला हे नक्कीच लक्षात आल्यामुळे तीने १० जानेवारी २०२० तारीख निवडली असावी. १० जानेवारी २०२० ला अजून कोणताही सिनेमा रिलीझ झाला असता तर माझ्या मते तो चालायला पहिजे अशी ग्रहस्थिती नक्कीच होती.

Tanhaji

छपाक सिनेमात प्रेक्षकांना अपेक्षीत करमणूक काहीच नसावी, कारण ना ती लव्हस्टॊरी आहे ना तो अ‍ॅक्शन सिनेमा आहे ना विनोदी सिनेमा. अ‍ॅसीड फ़ेकून चेहेरा विद्रूप झालेल्या मुलीची कहाणी कितीही रंगवली तरी लोकांच्या मनात जागा करण्याचा फ़ॉर्म्युला तो नसावा. पण १० जानेवारी २०२० ला रिलीझ झाल्यामुळे या सर्वावर मात करुन सिनेमा किमान खर्च भरुन येईल इतका चालला.
Choricha Mamla 2020
३१ जानेवारी २०२० ला चोरीचा मामला नावाचा दुसरा मराठी सिनेमा रिलीझ होत आहे. १९७६ साली चोरीचा मामला नावाचा निळू फ़ुले, यशवंत दत्त, उषा चव्हाण कलाकार असलेला पहिला सिनेमा प्रदर्शीत झाला होता. चोरीचा मामला, मामाही थांबला हे सचीन च्या गंमत जंमत सिनेमातले गीत खुप चालले. यामुळे जेव्हा गुगल वर सर्च करताना हा सिनेमा लगेचच दिसत आहे. हिंदी सिनेमा भारतदेश डोळ्यासमोर ठेऊन काढला जातो पण मराठी सिनेमाचे तसे नाही. हा सिनेमा महाराष्ट्रातच चालणार त्यामुळे त्याचे टायटल मराठी माणसांना परिचीत असेल आणि विनोदी सिनेमा असेल तर निम्मा व्यवसाय झाल्यात जमा आहे.

मराठी सिनेमा रिलीझ करताना निर्मात्याला हिंदी सिनेमा रिलीझ होण्याच्या तारखा सोडाव्या लागतात कारण मराठी प्रेक्षक सुध्दा बिग बजेट, बहू चर्चीत सिनेमा याच दिवशी रिलीझ होणार असेल तर मराठी सिनेमा त्या आठवड्यात चांगला असून आपटतो. याचे कारण मुहूर्त नसून सिनेमा प्रेक्षकांचे अर्थकारण आहे. आजकाल सहकुटूंब सिनेमा मल्टीस्क्रिन सिनेमा गृहात पहाणे म्हणजे किमान एकहजार तर कमाल दोन हजार रुपये खर्च होतात. त्या आठवड्यात मराठी माणून दोन सिनेमे नक्कीच पहात नाही.

यामुळे मराठी सिनेमाच्या वाट्याला चांगले मुहूर्त येतच नाहीत किंवा सिनेमा तयार असूनही वाट पहावी लागते. ३१ जानेवारी २०२० लाच पाच हिंदी सिनेमे रिलीझ होत असताना यापैकी बिग बजेट, बहूचर्चीत, प्रसिध्द सिनेकलाकारांच्या त्या सिनेमातील रोलमुळे सिनेमा चालेल असा एकही सिनेमा नाही ही जमेची बाजू आहे. या दिवसाचे पंचांग आणि पहिला शो ज्या वेळेला रिलीझ होतो यावेळेचे लग्न पहाता हा सिनेमा चांगला व्यवसाय करेल याची खात्री वाटते.

Sunday, December 8, 2019

१६ डिसेंबर २०१९ ते १४ जानेवारी २०२० या काळाचे राशीभविष्य ( मेष -वृषभ- मिथुन )


नमस्कार !  हरी ओम, ज्योतिषप्रेमी लोकहो, खासकरुन राशीभविष्य प्रेमी लोकहो. दर  महिन्याचे राशीभविष्य हे सदर आपल्या आग्रहास्तव पुन्हा ब्लॉगवर आणले आहे.. दर महिन्यात साधारण पणे १५- १६-१७  तारखेला रवि अर्थात सुर्य एकाराशीतून दुसर्या राशीत जातो. रवि रास बदलल्यानंतर साधारण पणे एक महिना एकाच राशीत असतो. मी अश्या रवि महिन्याचे राशीभविष्य सांगतो. अनेकांना ते आवडते तसेच अनुभवाला येते.

या महिन्यात रवि अर्थात सुर्य १६ डिसेंबरला २०१९ ला धनु राशीत जाणार आहे
बुध २५ डिसेंबरला ला धनु राशीत जाणार आहे.
मंगळ २५ डिसेंबरला वृश्चिक राशीत जाणार आहे.
शुक्र ८ जानेवारी २०२० ला कुंभ  राशीत जाणार आहे.

धनु राशीत संपुर्ण महिन्यात चंद्र, बुध, रवि या या महिन्यात येणारे ग्रह तसेच आधीपासून धनु राशीतच बसलेले गुरु, शनि, केतू आणि प्लुटो यामुळे धनु राशीत सात ग्रह येतील. २५ डिसेंबर २०१९ ची अमावस्या आणि २६ डिसेंबर रोजी असलेले कंकणाकृती सुर्यग्रहण या बाबतचा लेख नुकताच प्रसिध्द झाला आहे.


जानेवारी २०२० पासून नविन वर्ष सुरु होते. यासाठी वार्षिक राशी भविष्य मी आधीच प्रसिध्द केले आहे.

त्याच्या ब्लॉगवर असलेल्या लिंक आणि युट्युब वरच्या लिंक खाली पहा.
https://gmjyotish.blogspot.com/p/blog-page_54.html  ( मेष ते कन्या रास )

https://gmjyotish.blogspot.com/p/blog-page_97.html  (  तुळ ते मीन रास )
वार्षिक राशीभविष्य २०२०
मेष -वृषभ- मिथुन  https://youtu.be/b97dxZOyD_g
कर्क -सिंह-कन्या  https://youtu.be/K32EZmPdVZc
तुळ- वृश्चिक - धनु  https://youtu.be/PUCLnZmjx40
मकर-कुंभ-मीन   https://youtu.be/ZheFl5O3Xmc

आता राशीनिहाय १६ डिसेंबर २०१९ ते १४ जानेवारी २०२० या काळाचे राशीभविष्य पहा. हे राशीभविष्य लग्नराशीकडून पहावे. लग्नरास माहित नसल्यास चंद्रराशीकडून पहावे.
  
मेष रास:

आपल्या राशीचा मालक मंगळ २५ डिसेंबर २०१९ पर्यंत तुळ राशीत आहे. काही जणांना २५ डिसेंबर २०१९ नंतर आरोग्याच्या समस्येला तोंड द्यावे लागेल.  आपल्याला हा महिनाभर प्रसिध्दी मिळण्याचे योग आहेत. खेळाडुंना अशी प्रसिध्दी सहज मिळेल. विद्यार्थी आणि कलाकारांना सुध्दा महिनाभर यश मिळेल. नोकरीत आपल्या हाताखालचे लोक आपल्या वरिष्ठांबरोबर काय चर्चा करतात याचा अंदाज घ्या.

आपला वैवाहीक जोडीदार या महिन्यात ८ जानेवारी नंतर पगारवाढ किंवा व्यवसाय करत असेल तर त्यातून फ़ायदा झाल्याची बातमी देईल. आपल्याला स्वत:ला सुध्दा अकस्मात धनलाभ लॉटरी किंवा अन्य मार्गाने होण्याची शक्यता या महिन्यात आहे. आपली निर्माण केलेली कोणतीही कला आपल्याला कॉपी राईट म्हणून काही धन देऊन जाईल.

वृषभ रास :

अनेक दिवस एखाद्या गोष्टीसाठी संघर्ष करत असाल तर ती गोष्ट ८ जानेवारी २०२० नंतर आपल्याला मिळेल. या महिन्यात आरोग्य ठीक रहाणार नाही असा अनुभव काही जणांना येईल. याचे कारण नेहमीची डायबेटीस किंवा तत्सम दुखणी नसून प्रतिकार शक्ती कमी होण्याने असेल. २५ डिसेंबर २०१९ नंतर अनेक वृषभ राशीच्या लोकांना उरलेला महिना फ़ारच रोमॅंटीक झाल्याचा भास होईल.

ज्यांना कुणालातरी प्रपोज करावे असे वाटत असेल तर २५ तारखे नंतर अशी संधी घ्या. अनेक प्रेमी जनांना प्रेमविवाह होण्यासाठीच्या अडचणी दुर होताना दिसतील. एकंदरीत विवाह झाला असेल वा नसेल, तुमच्या जीवनात हा थंडीचा सिझन गुलाबी रंग घेऊन आला आहे याची जाणीव करुन देणारा हा महिना असेल.

मिथुन रास :

या महिन्यात २५ तारखेनंतर आपला विवाह झालेला नसल्यास त्या संदर्भात बोलणी सुरु असतील तर निर्णय होईल. या महिन्यात भावंडे काही चांगली बातमी देतील किंवा गरज असल्यास मदत सुध्दा करतील. अनेकदा एखाद्या व्यक्तीने आपले ऐकावे असे वाटत असते परंतु आपली शब्द रचना योग्य नसल्यामुळे किंवा योग्य वेळ नसल्यामुळे याचा परिणाम साधत नाही. डिसेंबर महिन्यात २५ तारखेपर्यंत उत्तम शब्दरचना करुन योग्य वेळ साधून आपण संवाद केल्यास ज्याला इंग्रजीत पॅराडाईम शिफ़्ट किंवा मराठीत मत परिवर्तन म्हणावे असा परिणाम नक्की साधेल.

२५ तारखेनंतर आपल्या घनिष्ट मित्रांशी दुरावा निर्माण होण्याचे प्रसंग येतील. असे घडू नये असे वाटत असेल तर फ़क्त शब्द हे शस्त्र आहे असे नाही तर मित्रांच्या बाबतीत आपली प्रत्येक कृती विचारपुर्वक करा. जे कलाकार आहेत त्यांच्या कलाकृतीला या महिन्याच्या अखेरीला प्लॅटफ़ॉर्म मिळेल. या निमीत्ताने प्रसिध्दी योग ही येतील.
                    
                             ------------------

मी ज्योतिष शिकायला लागल्यापासून काही चुकीच्या प्रथांचा विचार करतो आहे. धर्म ग्रंथामधे यासाठी काही कारण सांगीतले आहे का ते शोधतो आहे. जेष्ठ धर्माधिकार असलेल्या जेष्ठांचे विचार ऐकतो आहे. या तीनही प्रथा का आहेत याचे कारण अद्याप समजले नाही पण या तीनही प्रथा गैर आहेत अनावश्यक आहेत आणि अनाठायी याची भिती पसरली आहे.

या पैकी पहिली प्रथा पौष महिन्यात विवाह करु नयेत पुढे जाऊन यासंदर्भात बोलणी करु नयेत, स्थळे पाहू नयेत असेही गैरसमज आहेत. आज याबाबत आपण विस्ताराने चर्चा करणार आहोत कारण लवकरच पौष महिना दिनांक २७ डिसेंबर २०१९ ते २४ जानेवारी २०२० या काळात आहे.

या संदर्भात अजून माहिती ही लिंक क्लिक करुन वाचा.


https://gmjyotish.blogspot.com/2019/12/blog-post_16.html

Monday, November 11, 2019

जन्मकुंडली तयार करताना जन्मवेळ नेमकी कोणती घ्यावी ?

आपल्या पैकी अनेकांना माहित आहे की जन्मकुंडली तयार करण्यासाठी जन्मवेळ, जन्मतारीख आणि जन्मस्थळ ह्या तीन गोष्टी आवश्यक असतात. या तीन गोष्टी का आवश्यक असतात असा प्रश्न केला तर तो एक वेगळा चर्चेचा विषय होईल. हा विषय ज्योतिषशास्त्राचा गाभा असल्यामुळे चर्चा फ़क्त ज्योतिष शिकलेल्यांना समजेल आणि इतर सामान्य ज्योतिषप्रेमींना समजणार नाही म्हणून हा विषय न घेता फ़क्त जन्मवेळ कोणती घ्यावी या विषयावर चर्चा करु. याचाच अर्थ असा की जन्मवेळ बरोबर नसेल तर आपण दिलेल्या जन्मवेळेनुसार आलेली जन्मकुंडली बरोबर न आल्यामुळे आपल्याला कितीही विद्वान ज्योतिषाने सांगीतलेले भविष्य चुकेल. आपला वेळ, आपण या ज्योतिषाला दिलेली फ़ी वाया जाईल या शिवाय चुकीचा सल्ला बरोबर मानून घेतलेले निर्णय चुकल्याने किती नुकसान होईल ?

जन्मकुंडली तयार करताना जन्मवेळ नेमकी कोणती घ्यावी ?


ही सर्व चर्चा करण्यापुर्वी बालकाच्या जन्माची प्रक्रिया आधी नीट समजाऊन घ्यायला हवी.

बालक जन्माला येते ही प्रक्रिया माझ्या मते तीन टप्यात पुर्ण होते. यातील पहिला टप्पा,  बालक आईच्या शरीरातून बाहेर येते. ही प्रक्रिया नैसर्गीक म्हणजे सिझेरीयन न करता होणारी प्रसुती असो की सिझेरीयन पध्दतीने होणारी प्रसुती असो. या दोनही टप्यात आईच्या शरीरापासून बालक सुटे झाले तरी ते आपले श्वसन सुरु करत नाही.आईच्या शरीरापासून सुटे झालेले बालक लगेचच रडत ही नाही.

याचे कारण आता पाहू. आईच्या गर्भाशयापासून एक २० इंच किंवा ५० सेंटीमीटर नळी ज्याला मराठीत नाळ असे म्हणतात ती बालकाच्या बेंबीला जोडलेली असते. आईपासून बालक सुटे झाले तरी ही नाळ जोडलेली असते. जो पर्यंत ही नाळ जोडलेली आहे तो पर्यंत आई आणि बालकामध्ये नाते नसते. बालक आईपासून सुटे झाले तरी ते आईच्याच शरीराचा भाग असते. कारण त्याला ऑक्सीजन अर्थात प्राणवायू आईने घेतलेल्या श्वासामधूनच मिळत असतो.

दुसरा टप्पा जेंव्हा नाळ कापली जाते ती आहे. या नंतर बालकाच्या शरीरातील ऑक्सीजन ची पातळी हळू हळू खाली जाऊ लागते. नुकतेच जन्मलेले बाळ फ़ारसे हालचाल करत नसते त्यामुळे त्याची ऑक्सीजनची गरज ही कमी असते. पण साधारण पणे तीन ते चार मिनीटात बालकाच्या शरीरातील ऑक्सीजनची पातळी खुपच कमी होते.  असे झाले की बालकाचा मेंदू सुचना देतो आता स्वतंत्र श्वसन करण्याची आवश्यकता आहे. ही सुचना मिळताच आयुष्यात प्रथमच बालक जोर लाऊन फ़ुफ़्फ़ुसे उघडते आणि पहिला श्वास घेते आणि रडते.

बालकाच्या जन्माच्या प्रक्रियेत तिसरा टप्पा म्हणजे बालकाने पहिला श्वास घेणे हा आहे.   असे करताना  बालकाला प्रचंड शक्ती खर्च करावी लागते.याचा बालकाला खुप त्रास होऊन बालक रडते.  आईच्या पोटात जागा कमी असल्याने फ़ुफ़्फ़ुसे म्हणजे हवा भरण्याची पिशवी जशी नवी प्लॅस्टीक बॅग चिकटलेली असते तश्या अवस्थेत असते. बालक जोर लावताच त्यात हवा भरली जाते. पण हे करताना बालकाला रडू येते आणि ते जोराने रडते.

कै. डॉ भा.नि. पुरंदरे हे आंतराष्ट्रीय किर्तीचे स्त्रीरोग तज्ञ अर्थात गायनोकॉलॉजिस्ट होते. त्यांनी  शल्यकौशल्य नावचे आत्मचरित्र लिहले आहे. त्यांच्या या आत्मचरित्रामधे त्यांनी प्रथम बाळ रडते, ती जन्मवेळ जन्मकुंडली तयार करण्यासाठी घ्यावी असे सांगीतले आहे. तुम्ही म्हणाल या स्त्रीरोग तज्ञ किंवा प्रसुतीतज्ञ डॉक्टर साहेबांचा आणि ज्योतिषशास्त्र विषयाचा काय संबंध ? त्यांचे म्हणणे प्रमाण का मानायचे ?

कै. डॉ . भा.नि. पुरंदरे हे आंतरराष्ट्रीय किर्तीचे स्त्रीरोग तज्ञ अर्थात गायनोकॉलॉजिस्ट होते तसेच ते ज्योतिषी सुध्दा होते. त्यांनी त्यांच्या शल्यकौशल्य ह्या आत्मचरित्रात पान १८९ ते पान १९४ ह्या पाच पानांवर अनेक जन्मकुंडली  दिल्या आहेत.  जन्मकुंडलीचा अभ्यास, एखादी केस हाताळण्यासाठी डॉक्टर्स ना कसा उपयोग होतो यावरही ह्या पुस्तकात दिले आहे.

त्यांच्या मते एखादी व्यक्ती शेवटचा श्वास बाहेर टाकते हा जर मृत्यु मानला तर पहिला श्वास घेते हा जन्म मानला पाहिजे. ह्या गोष्टीच्या समर्थनासाठी एक हायपोथीकल केस घेऊ. जर नाळ कापण्यापुर्वी मातेला पोटेशियम सायनाईड सारखे विष दिले गेले. असे विष क्षणात मातेच्या शरीरात परसते. तसेच ते नाळे मार्फ़त बालकापर्यंत येऊ शकते. यामुळे आई आणि बालकाचा मृत्यु होऊ शकतो. परंतु नालविच्छेदनानंतर म्हणजे नाळ कापल्यावर असे घडणार नाही. कारण आईच्या शरीराचा आणि बालकाचा नाळेचा संबंध तेंव्हा नसेल.

नुकतेच जन्माला आलेले बालक ही स्वतंत्र श्वास घेऊ लागते. बालक स्वतंत्र श्वास घेऊ लागते याची खुण म्हणजे बालक जेंव्हा प्रथम रडते ती वेळ असते. हीच जन्मवेळ घ्यावी असे भारतातील बहुतांशी ज्योतिषांनी मान्य केलेले आहे.

आपण विचाराल काही केसेस मधे बालक रडत नाही तर काय करायचे ? कोणती जन्मवेळ घ्यायची ? आपण थ्री इडीयड्स चित्रपटात पाहीले असेल. बालकाला अश्यावेळी मिडवाईफ़ किंवा नर्सेस आणि डॉक्टर्स पाठीवर थोपटतात. चिमटे सुध्दा काढतात. यामागे उद्देश असा असतो त्याने वेदना होऊन हातपाय हलवावेत. असे केले की त्याच्या शरीरामधे ऑक्सीजन पातळी झपाट्याने खाली जाते आणि बालक स्वत: श्वास घेण्यासाठी फ़ुफ़ुसे उघडते. अर्थातच हे केल्यावर बहुतांशी बालके रडतात.

असेही घडत असेल की बालके सुखरुप श्वासोश्वास करु लागतात पण मात्र रडत नाहीत. त्या केस मधे ह्या दरम्यानची वेळ घेणे याला पर्याय नाही. पण ९०% बालके रडतात असे गृहीत धरले आणि ती वेळ नोंदली गेली तर जन्मवेळ  मिनीटांच्या हिशोबात अचूक असेल.

जितकी जन्मवेळ अचूक तितके बालकाचे भविष्य बरोबर येते. अर्थात यासाठी ज्योतिषी निष्णांत असला पाहीजे. गेल्या ५० वर्षांपासून केपी अर्थात कृष्ण्मुर्ती पध्दतीन जन्मकुंडलीचा अभ्यास केला जातो. ही पध्दत पारंपारीक पध्दतीपेक्षा जास्त अचूक असली तरी यासाठी जन्मवेळ मात्र अचूक असावी लागते. पारंपारीक पध्दतीमधे जे ज्योतिषी स्पष्ट्ग्रह पाहूनच भविष्य सांगतात त्यांचे ही भविष्य अचूक असते.

यावर आणखी एक प्रश्न सगळे विचारतील की आमची जन्मवेळ आम्ही रडलो तेंव्हा नोंद्लेली आहे किंवा नाही हे कसे समजावे ? फ़ारच कमी ज्योतिषी ह्यासाठी जन्मवेळेचे करेक्शन करुन भविष्य सांगतात. पण यासाठी जन्माला आल्यानंतरच्या घटना पडताळून ही वेळ निश्चीत केली जाते. स्वत: कृष्णमुर्ती महोदयांनी यासाठी बर्थ टाईम करेक्शन असे तंत्र शोधून काढले आहे. हे तंत्र सुध्दा पुढच्या पिढीतील ज्योतिषी अजून विकसीत करत आहेत.

याचर्चेचा निष्कर्श काढला तर इथून पुढे जन्माला येणार्या बालकांची जन्मवेळ अचूक नोंदणे आवश्यक आहे. नुकतीच जन्माला आलेली बालके स्वत: तसे करु शकणार नाहीत. यामुळे ही जबाबदारी आपला विश्वास असो किंवा नसो ती बालकांच्या वडीलांची आहे. बालकाने ज्योतिषावर विश्वास ठेवायचा की नाही हा निर्णय त्याला घेऊ द्यावा. पण त्याच्या जन्माची अचूक वेळ नोंदवण्याची जबाबदारी मात्र सर्वप्रथम बालकाच्या वडीलांनी घ्यावी.

मला कल्पना आहे की ह्या विषयावर अनेक प्रश्न येणार आहेत. मी त्यातले योग्य प्रश्न निवडून याची समर्पक उत्तरे देईन. मी स्वत: प्रसुतीतज्ञ नाही. यामुळे या विषयावरील माहीती वाचूनच मी ही चर्चा करत आहे. मानवी शरीर हे १००% आजच्या सायन्स ला समजलेले नाही. असे असताना बालक नेमके कसे प्रथम रडते यावर एखादी अजून थेअरी असेल. आजच्या चर्चेचा हा विषय नाही. जर शेवटचा श्वास सोडणे म्हणजे मृत्यु मानला तर पहिला श्वास घेणे हा जन्म मानावा आणि त्याचे इंडिकेटर म्हणजे जन्माला आलेल्या बालकाचे प्रथम रुदन अर्थात रडणे आहे.

हा किंचीत तांत्रिक विषय मी माझ्या पध्दतीने समजाऊन सांगीतला.  मीच प्रथम हा सांगीतला असा माझा दावा नाही. अनेकांनी या विषयी लिहले आहे. आपण ही माहिती वाचण्यासाठी जो वेळ दिलात त्यासाठी धन्यवाद ! ही माहिती जर आवडली असेल तर इमेल सबस्क्राईब करा म्हणजे नविन पोस्ट येताच आपल्याला इमेल वर याची सुचना मिळेल.  आपण सर्वांना समजेल या भाषेत ज्योतिष विषयावरील मुलभूत गोष्टींची चर्चा करत राहू. यामुळे अगदी सर्वांना ती समजेल.

Saturday, October 19, 2019

Tuesday, October 8, 2019

१७ अक्टोंबर ते १५ नोव्हेंबर २०१९ काळासाठी रवी तुळ राशीत असताना महिन्याचे राशीभविष्य


नमस्कार !  हरी ओम, ज्योतिषप्रेमी लोकहो, खासकरुन राशीभविष्य प्रेमी लोकहो. दर  महिन्याचे राशीभविष्य हे सदर आपल्या आग्रहास्तव पुन्हा ब्लॉगवर आणले आहे.. दर महिन्यात साधारण पणे १५- १६-१७  तारखेला रवि अर्थात सुर्य एकाराशीतून दुसर्या राशीत जातो. रवि रास बदलल्यानंतर साधारण पणे एक महिना एकाच राशीत असतो. मी अश्या रवि महिन्याचे राशीभविष्य सांगतो. अनेकांना ते आवडते तसेच अनुभवाला येते.

या महिन्यात रवि कन्या राशीमधून तुळ राशीत १७ अक्टोंबर २०१९ ला जाणार आहे.
बुध  तुळ राशीमधून वृश्चिक  राशीत २३ अक्टोंबर जाणार आहे.
शुक्र तुळ मधून वृश्चिक  राशीत २८ अक्टॊंबरला जाणार आहे.
गुरु हा वर्षात एकदा रास बदलणारा ग्रह वृश्चिक राशीतून धनु राशीत ४ नोव्हेंबर २०१९ ला जाणार आहे. ( या बद्दल प्रत्येक राशीवर होणारे परिणाम आपण दिवाळी अंकात पाहू. )
बुध वृश्चिक राशीमधून वक्री गतीने तुळेत ७ नोव्हेंबर २०१९ ला जाणार आहे.
मंगळ कन्या राशीतून तुळ राशीत १० नोव्हेंबर ला जाणार आहे.

या महिन्यात २७ नोव्हेंबर ते २९ नोव्हेंबर २०१९ काळात दिवाळीचे मुख्य दिवस आहेत. त्यातही बलीप्रतिपदा म्हणजे २८ नोव्हेंबर २०१९ ला विक्रमसंवत ही कालगणना अर्थात व्यापारी वर्ष २०७६ सुरु होत आहे.  हे वर्ष कसे जाईल हे आपण दिवाळी अंकात पाहू.

आता पाहू १७ अक्टोंबर २०१९ ते १५ नोव्हेंबर २०१९ या महिन्याचे राशीभविष्य. हे राशीभविष्य लग्नराशीकडून पहावे. जर लग्नराशीकडून पहाणे शक्य नसेच तर चंद्र राशीकडून अनुभवता येईल.



मेष रास : आपल्या राशीला मी एक आनंदाची बातमी सांगत आहे. दिवाळी संपली की लगेचच गुरु धनु राशीत जाणार आहे. इतके दिवस आठवा असलेला गुरु आपल्यावर बंधने टाकून होता ती आता संपतील. गुरु बदलाचे आपल्या राशीला होणारे परीणाम नक्षत्रप्रकाश दिवाळी अंकात पाहूच पण आत्ता गुरु सोडून इतर ग्रहांचे परीणाम इथे पाहू.

आपल्या राशीचा मालक मंगळ सहाव्या स्थानी आहे. तो दहा नोव्हेंबर म्हणजे अगदी शेवटी तुळ राशीत जाईल. हा महिना तो कन्या राशीत आहे. अजूनही काही शत्रू शिल्लक असतील तर फ़टाक्यांच्या आवाज करा म्हणजे नुसती हूल दिली तरी पुरे आहे. या महिन्यात मंगळ ३१ अक्टोंबर २०१९ ला चित्रा नक्षत्रात गेल्याने विपत्ती अर्थात संकटे संपुन जातील. चित्रा हे मंगळाचे स्वत: चे नक्षत्र आहे. मुलांच्या चिंता असतील तर या महिन्यात संपतील. दिवाळीत गोड पदार्थ असतात पण डायबेटीस असेल तर जपून खा आणि आपल्या जोडीदाराला सुध्दा आरोग्याची काळजी घेत दिवाळी करायला सांगा.  असे वागलात तर दिवाळी आनंदातच जाईल यात शंका नाही.




वृषभ रास : तुमच्या राशीचा मालक २८ अक्टोंबरला सातव्या स्थानात जात आहे. इतके दिवस शुक्र सहाव्या स्थानात म्हणजे बंदीवासात होता तो आता सातव्या स्थानात म्हणजे एक तर रोमेंटीक स्थानी जाणार आहे. शिवाय वृश्चिक ही राशी सर्व काही गुप्त ठेवणार आहे. यामुळे जे काय घडेल ते फ़क्त तुम्हालाच माहीत असेल. याची जाहीर चर्चा होणार नाही. पंचमेश बुध २३ तारखेला सातव्या स्थानी येऊन बसलेला आहे त्यामुळे तुम्हा दोघांच्या रोमान्स ला बहार येईल. व्यापार्यांना उत्तम व्यावसायीक संधी येतील. या दिवाळीत सिझनल विक्री असेल तर छप्पर फ़ाड विक्री होणार आहे.

गुरु बदल पुढील वर्षभर तुम्हाला फ़ारसा अनुकूल नाही परंतु तुमच्या सारखे धोरणी कुणीच नाही त्यामुळे या आठव्या गुरुचा त्रास तुम्हाला फ़ारसा नाही. गुरु बदल झाल्यावर काय करायचे हे दिवाळी अंकात सांगणारच आहे पण योगाभ्यास हा जास्त या काळात करणे हीताचे असेल.

दिवाळीला सुरू होणार्या नविन वर्षाला दररोज योगाभ्यासाचा संकल्प केलात तर गुरू अनुकूल होईल आणि दिवाळीच काय वर्ष ही चांगले जाईल.



मिथुन : तुमच्या राशीचा मालक २३ अक्टोंबरला वृश्चिक या शत्रु राशीत जात आहे. काही क्रिएटीव्ह सुचले असेल तर लिहून काढा किमान मुद्दे तरी लिहा. २३ अक्टोंबर नंतरचा काळ जरी लिखाणाला अनुकूल नसला तरी वाणीने घायाळ करण्यासाठी चांगला आहे. २३ तारखेनंतर एखादा शत्रू शोधून मनात नसेल तर वर्मी शाब्दीक घाव घालण्याची उर्मी येणारच आहे.


भावंडे या महिन्यात काही शुभ वार्ता घेऊन येतील. मुलांच्या पेक्षा मुलींच्या चिंता करण्याची वेळ येणार नाही असे पहा. होणारा गुरुबदल आपल्याला काय काय संधी देणार आहे ते दिवाळी अंकात पाहू. सप्तमेश सप्तमात तो ही गुरु बदल झाल्याने अविवाहीत असाल तर या वर्षभरात बार उडवून द्याल असे दिसत आहे.  विवाहानंतर कसे वागायचे याचा विचार करा. मिथुन राशीचा प्रभाव असला म्हणजे बालीशपणा दिसतो. असे आता वागून चालणार नाही. सुन असो की जावई पदोपदी तुमची परीक्षा असते. याचा विचार केलात तर वर्ष सुध्दा आनंदात जाईल.

कर्क रास: या महिन्यात संपुर्ण महिनाभर रवि तुळ या राशीत असणार आहे. वंशपरंपरागत काही मिळणे असल्यास या महिन्यात मिळायला हरकत नाही. अनेक जण आलेल्या धनाचा उपयोग प्रॉपर्टी खरेदीसाठी करण्याचे योग या महिन्यात आहे. कलाकारांची लॉटरी लागण्याचे योग आहेत पण त्याच बरोबर इनकम टॅक्स खात्याकडून नोटीस येणार नाही ना या कडे लक्ष द्यावे.

महिनाभर पराक्रम करण्याची उर्मी रहाणार आहे मग ती बौध्दीक असो की शारिरीक. कर्क लग्नाला हा पराक्रम शारिरीक आणि बौध्दीक पेक्षाही भावनीक जास्त असेल. या महिन्यात कम्युनिकेशन अर्थात मिडीया, लेखन, प्रकाशन, पत्रकारीता या सारख्या व्यवसायातले लोक काही वेगळे करुन चमकदार कामगिरी करतील. या महिन्यात लहान भावंडांची चांगली बातमी समजेल आणि भावंड जर गायन वादन करत असेल तर त्याबाबत एखादी घटना लक्षात राहील.

या महिन्यात अनेक कर्क राशीच्या लोकांना २८ तारखे पर्यंत अनेकदा प्रणय करण्यास संधी लाभेल. प्रेम गीत जोडीदाराला गाऊन दाखवण्यापासून ते सिनेमाला एकत्र जाण्यापर्यंत फ़क्त नाही तर अनेक बाबीत लक्षात राहील असे काही घडेल. इतके काही घडल्यावर दिवाळी आनंदात तर रहाणारच ना ?

सिंह रास : तुमच्या राशीचा मालक महिनाभर तुळ या राशीत रहाणार आहे. खर तर स्थान पराक्रमाचे पण रास मात्र नीच, अश्या परिस्थितीत सिंह महिनाभर असेल. यामुळे सिंहाने डरकाळी फ़ोडली तरी स्वर घशाच्या बाहेर पडणार नाहीत. यासाठी आजारपण असेल तर वेळीच उपचार करा. पुढारी मंडळींना काळ अनुकूल नाही म्हणून नमते घेण्याशिवाय पर्याय नाही.

प्रवचन कार, व्याख्याते मंडळींना हा महिना जोरदार असेल. नाटककार, संगीतकार आणि गायक सुध्दा दिवाळी पहाट पासून अनेक रियालीटी शो मधे अनेकांना दिसतील. आपला आवाज आणि गायकी यांना मोठे प्रोत्साहन या महिन्यात मिळेल.

या महिन्यात अनेकांना रोख रक्कम कुठे गुंतवावी यावर विचार करायला लागणार आहे. दिवाळी व लक्ष्मीपुजन मोठ्या आनंदात आणि समाधानात करण्याचे योग आहेत कारण या महिन्यात तरी आपल्याला फ़ारशी चणचण जाणवणार नाही.

कन्या रास : आपल्या मालक बुध तेवीस अक्टोंबर पर्यंत धनस्थानी नंतर पराक्रम स्थानी जाऊन १ नोव्हेंबरला वक्री होऊन ७ नोव्हेम्बरला पुन्हा धनात म्हणजे दुसर्या स्थानी जात आहे. एखादा ग्रह वक्री  झाला म्हणजे ५० % फ़ळ देतो म्हणून महत्वाची कामे १ नोव्हेंबर पर्यंत संपुर्ण करा.

या महिन्यात आपल्याला व्यापारात, बौध्दीक खेळात म्हणजे कोडी सोडवणे इत्यादी आणि लेखन कार्यात धन मिळण्याचे जोरदार योग १ नोव्हेंबर पर्यंतच आहेत. आपले पैसे वसूल करणे जर सोपे नसेल तर १ तारखेच्या आधी किमान पोस्ट डेटेड चेक मिळतो का ते पहा. २३ तारखेपर्यंत जमा झालेली पुंजीची नीट  गुंतवणूक करा.

या महिन्यात दिवाळीच्या फ़राळासोबत चटकदार भेळ्पुरी इ. जिभेला पाणी आणणार्या पदार्थांचा आस्वाद घेण्याची संधी २३ तारखे पर्यंत आहे. या तारखेपर्यंत घरात स्त्री पाहूणे येण्याची शक्यता सुध्दा आहे. मावस बहीणी, मामे बहीणी, सख्खी बहीण त्याची मुले याने घर भरुन जाईल.

दिवाळीच्या पुर्व असे घरगुती संमेलन मोठ्या आनंदाचे असेल यात शंका नाही.

तुळ रास : तुमच्या राशीचा मालक शुक्र २३ अक्टोंबर पर्यंत तुळ राशीतच असणार आहे. गेले काही दिवस तो तुम्हाला यश देत आहे त्याबरोबर तुमचे व्यक्तीमत्व, तुमच्या कला यांना मोठे प्रोत्साहन देत आहे. हे सगळे जर पैशात कॅश झाले नाही तर काय उपयोग ? ही संधी २३ तारखेनंतर जेंव्हा शुक्र धनस्थानी जाईल तेंव्हा येईल. आपण साधना करुन मिळवलेल्या कलागुणांचे कौतूक आणि सोबत मानधनही मिळेल.

सध्या आपण निवडणूक लढवत असाल तर यश मिळण्याची संधी आहे. येण केण प्रकारेण आपल्याला निवडणुकीतच नाही तर महिनाभर यश मिळण्याचे योग आहेत. अनेक दिवस भिजत पडलेली प्रकरणे या महिन्यात सहजपणे मार्गी लावाल. प्रयत्न करावेच लागतील पण यश मिळेल.

आजवर बुडीत खात्यावर लिहलेले पैसे या महिन्यात २३ तारखेनंतर १ नोव्हेंबर पर्यंत वसूल करु शकाल. दिवाळी असली तरी अनेक व्यावसायीकांना दुर देशात व्यवसायानिमीत्ताने फ़िरावे लागणार आहे. आजकाल संवाद सोपा झाल्यामुळे व्हिडीओ कॉन्फ़रन्सींग करुन दिवाळीला घरातच आहोत असे समाधान सहज मिळवू शकाल. सणासुदीला घरच्यांशी संवाद आनंद मिळणे महत्वाचे आहे.

वृश्चिक रास : नोकरीच्या निमीत्ताने किंवा व्यवसायाच्या निमीत्ताने आपल्यालाही परदेशगमन किंवा दुर प्रवासाला जावे लागणार आहे. ज्यांना हे नेहमी करावे लागत नाही त्यांना ही दिवाळी घरापासून लांब रहाण्याने आनंद हिराऊन घेतल्यासारखे वाटेल परंतु पुर्वी पोस्ट कार्ड ने साधला जाणारा घरच्या लोकांशी संवाद तंत्रज्ञान विकसीत झाल्यामुळे आता जास्त आनंद देणारा झालाय हे काय थोडे आहे ?

या महिन्यात अनेक ग्रह व्ययस्थानात बसल्यामुळे जर खर्च, प्रवास, श्रम आणि चिंता यामुळे व्यापला असाल तर दिवाळीच्या आधी अनेकांना दिलासा मिळेल. बुध २३ ताराखेला बदलून लग्नी येत असल्याने  खर्च नियंत्रणात येईल. २८ तारखेला शुक्र लग्नी आल्यामुळे चिंता किंवा ताण असल्यास संपेल.

हे सगळे जरी असले तरी काही प्रमाणात अपेक्षीत घडत असल्यामुळे त्याचा आनंद कुणाला नाही समजला तरी तुम्हाला समजणार आहे यामुळे दिवाळीच्या पार्श्वभुमीवर चेहेर्यावर तुम्ही स्थितप्रज्ञ दाखवत असाल तरी मनात खुष असाल.

धनु रास :  झुम झुम के नाचो आज गाओ आज आए खुशी के गीत हो असे शब्द असलेले बहुदा मुकेश साहेबांचे गाणे ब्लॅक अ‍ॅड व्हाईट असले तरी पहावेसे वाटेल. https://youtu.be/k7aWtLcTaT4 वर्षभर गुरु महाराज व्यय स्थानी होते. नेकी करो दर्या में डालो असा हा अनुभव होता. फ़ायदा जाऊ दे पण चांगले केले असही कोणी म्हणत नाही असा काळ होता. या महिन्यात गुरु महाराज तुमच्या राशीत येतील आणि आत्मसन्माना पुढे जाऊन आपल्याला समाजात स्थान देतील यात शंका नाही.

गुरु महाराज बदलले म्हणजे लगेचच आपल्याला यश देणार असे होणार नाही परंतु नोव्हेंबर महिना अखेरीस याची चांगली फ़ळे मिळू लागतील. गुरु बदलाचे राशीवार भविष्य आपण दिवाळी अंकातच पहाणार आहोत.

खेळाडूंना ४ नोव्हेंबर नंतर होणार्या स्पर्धेत जोरदार यश मिळून चमकण्याची संधी मिळणार आहे. अनेक व्यावसायीकांना नफ़ा मिळवण्याच्या अनेक संधी या महिनाभरात चालून येतील आणि दिवाळी जोरदार आणि चमकदार होणार आहे.

मकर रास : आपल्याला अजूनही वाटच पाहायची आहे पण जानेवारीत शनि मकर राशीत येणार आहे. आपल्याकडे उतावीळ पण नाही धैर्य आहे म्हणून होणार्या कष्टाचे किंवा नुकसानीचे फ़ारसे दु:ख आपण चेहेर्यावर दाखवत नसाल कारण पुढे चांगले दिवस आहेत याचा आत्मविश्वास आपल्याला नवा उत्साह देतो.

काहींना या महिन्यात बॉसच्या अचानक बदलीमुळे तात्पुरती अधिकाराची जागा मिळणार आहे. आपल्या वरिष्ठांना आपल्यावर ही औट घटकेची जबाबदारी देण्याचा विश्वास आहे यात सारे काही आले. जरा हळूच ही जबाबदारी कायमची मिळते का याबाबत चाचपणी करा. लगेचच प्रमोशन नको म्हणाव पण जबाबदारी ची सवय झाल्यावर द्या म्हणाव. तो पर्यंत माझ्या डोक्यावर कुणाला बसवू नका हे मात्र ठासून सांगाच.

व्यावसायीक असाल तरी जबाबदार्या वाढणार आहेत. याची चांगली फ़ळे लवकरच मिळतील यावर विश्वास ठेवा. उच्च पदवी मिळवणार्यांना या महिन्यात सेमीस्टर परिक्षा पध्दतीत चांगले यश मिळेल. यामुळे दिवाळी आनंददायी जाणार आहे.

कुंभ रास : आपल्या राशीला २४ जानेवारी २०२० पर्यंत चांगला काळ आहे. कारण शनि आपल्या लाभ स्थानी आहे व याच लाभ स्थानात लाभेश गुरु ही येऊन बसणार आहे. हा गुरु नेमके काय लाभ देणार आहे ते आपल्याला दिवाळी अंकातच वाचावे लागेल.

जेंव्हा काळ चांगला असतो तेंव्हा लाभ सर्व बाजूनी होतो असे अनुभवाला येते. आपल्याही कुंडलीत आपल्या पार्टनरला या महिन्यात काही लाभ होणे अपेक्षीत आहे. व्यापार करणार्यांना अचानक सरकारी घोरणाचा लाभ मिळून फ़ायदा होताना दिसेल.

कुंभ लग्न राशीच्या शिक्षण क्षेत्रात असलेल्या, धार्मिक क्षेत्रात असलेल्या लोकांना धार्मीक किंवा शिक्षण क्षेत्रात असलेल्यांना उच्च  अधिकाराची पदे मिळण्याची संकेत या महिन्यात २८ तारखेच्या नंतर मिळत आहेत. अनेकदा यासाठी लॉबींग करावे लागते याची तयारी ठेवा.

ज्योतिषाची आवड असलेल्या, अभ्यास असलेल्यांना या महिन्यात वर्तवलेले भविष्य तंतोतंत बरोबर येण्याचे योग आहेत.एकंदरीत काय कुंभेची दिवाळी जोरदार असणार यात शंका नाही.

मीन रास : मीन लग्नराशी असलेल्यांना खुप काळ झगडावे लागले होते पण आता येणारा गुरु बदल त्यांच्या आयुष्यात फ़ेरबदल घडवून आणणार आहे. जास्त माहितीसाठी आपल्याला नक्षत्रप्रकाश दिवाळी अंकाची प्रतिक्षा करावी लागणार आहे.

या महिन्यात फ़क्त आपण आजारी पडणार नाही इतके प्रकृतीचे तंत्र संभाळावे लागणार आहे. हा भाग सोडला तर आपल्या राशीला बुध २३ तारखेनंतर अनुकूल होऊन व्यावसायीक सुवार्ता घेऊन येईल तर शुक्र २८ तारखेच्या नंतर काही खास व्यावसायीक किंवा नोकरदारांना अनेक दिवसांच्या प्रोजेक्ट नंतर फ़लदायी होताना दिसणार आहे. गुढ विद्या शिकणार्यांना काही तंत्र अवगत होईल जे कोणत्याही पुस्तकात नसेल. फ़ौजदारी केसेस चालवणार्या वकील मंडळीना एखादी केस त्यांच्या बाजूने लागण्याचे योग येतील.

या महिन्यात काहींना परदेशगमनाची संधी मिळेल. आधीच परदेशात गेलेले असाल तर जवळ जवळ महिनाभर अजून मुक्काम वाढण्याचे संकेत ग्रह देत आहेत. आता यामुळे दिवाळीला घरी नसाल हे बरोबरच असले तरी दिर्घ काळाच्या चांगल्या संधी मिळणार असतील तर दिवाळीच नाही का ?

शुभंभवतु